Вахтназ вуди Дербент райондин главайин вазифйир тамам апIурайи Наби Аьлиев улихьна йигъари “Татляр” агрофирмайин багълариз гъушну ва гьадушваъ тIумтIар уч апIрайидарин ляхнихъди таниш гъахьну.

 

Думу йигъан Наби Аьлиевдихъди РД-йин Халкьдин Собраниейин депутат, «Татляр» агрохолдингдин директор Ягь’я Гьяжиев, «Татляр» МУП-дин директор Азад Гьяжиев хъайи.
Агрохолдингдин багълариъ чвлин ляхнар апIру вахтна 1000-рихьна инсанар лихури шулу, дурарикан 150 гьаму агрохолдингдиъ, йисандин фаслиз дилигди, ляхниъ айидар ву.

Къайд апIуз ккундучузки, «Татляр» агрохолдинг Дагъустан Республикайиъ тIумтIар уч апIурайи варитIан чIатху карханйирикан саб ву. Сад йигъан дидин багълариан 500 тоннайихьна тIумтIар уч апIура. Гьамусяаьт тIумтIарин «Агъадайи» ва «Молдова» сортар машинариъди уьлкейин жюрбежюр шагьрарин аьхю базрариъ масу тувуз гъахура. Му агрохолдингдиъ Дербент райондин Татляр, Уллу-Теркеме, Падар, Берикей ва Деличобан гъуларин вакилари ляхин апIура. ТIумтIин багълари уьмуми кьадар 1700 гайин йишв бисура, душван саб гектариан 120-дилан – 150-риина центнер бегьер гъадабгъура. ТIумутIчивалин мяишатдин артмиш’вали райондин агьалйир ляхнихъди тямин апIбан месэлара гьял апIура. ТIумтIин багълариз лихуз республикайин жара районарианра инсанар гъюри шулу. Агрохолдингдин кIулиъ айидарин гафариинди, гьамусдиз багълариан 5000 тоннайихьна тIумтIар уч дапIна.