Дербент райондин администрацияйин пресс-гъуллугънаан учуз мялум гъапIганси, 8-пи сентябриъ вахтназ вуди Дербент райондин главайин вазифйир тамам апIурайи Наби Аьлиевди РД-йин гъулан мяишатдин ва ипIру-убхъру сурсатарин министр Эмин Шихгьясановдихъди ва “АПХ Эко-Культура” ООО компанияйин вакиларихъди Дербент райондиъ теплицйирин комплексдин аьхю проект тикмиш апIбан гьякьнаан месэлйир гьял гъапIну.
Дербент райондиъ кьюрдун вахтнара жюрбежюр набататар ва мейвйир гьясил апIбан бадали, теплицйирин комплекс тикмиш апIбаз 30 миллиарддихьна пулин дакьатар жалб апIруваликан къайд гъапIнийи. «АПХ Эко-Культура» ООО-йин президент Александр Рудаковдин гафариинди, проект гьяракатнаъ ипган, 4 агъзур касдиз лихру йишварра ачмиш хьиди.
Наби Аьлиевди чан нубатнаъ Дербент райондиъ 200 гектар жилиин теплицйирин комплекс дивбахъди аьлакьалу вуди арайиз гъюрайи месэлйир ва суалар гьял гъапIну.
«Эко-Культура» агропромышленный комплекс элебку йишваъ экологияйин марцци мейвйир гьясил апIурайи Урусатдин варитIан чIатху мяишат ву. Думу мяишатди асас вуди памадрар, арфанйир, бадамжанар, иставутар ва бистнин укIар гьясил апIура.
