Гьамусяаьт Дагъустандин кафари терефнаъ, асас вуди Къизлар райондин аьтрафариин, гьяракатниинди дюгдин тахил уч апIбиин машгъул духьна. «Мянфяаьтлу АПК» проект уьмриз кечирмиш апIури, аьхиримжи йисари гъулан мяишатдин цирклари хайлин ужудар хъуркьувалар улупура, гьадму гьисабнаан дюгю убзувалиан ва думу ккадабцIувалиан.

 

Магьа цци, Дагъустандиъ дюгю гьясил апIуз хъюгъю сабпи йисарилан мина гъийин йигъаз, сабпи ражари вуди варитIан гизаф дюгдин бегьер уч дапIна, хъа гьелелиг хутIлариъ иган апIувал аьхирихъна дуфнадар.

Дагъустан Республикайин гъулан мяишатдин ва ипIру-убхъру сурсатарин министерствойин пресс-гъуллугънаан туврайи мялуматариинди, сач республикайиъ дюгю дубзнайи хутIларин кьадар 21,4 агъзур гектар вуйи. Думу кьадар цци 25,5 агъзур гектариина артухъ гъапIну.

Гьаму йисан дюгю дубзнайи хутIларин уьмуми кьадарнакан гьелелиг иган 23,7 агъзур гектариътIан (93%) дапIнадар.

Улупнайи кьадар хутI-лариан уч гъапIу дюгдин бегьерлувал сачдихъди тевиш, гъубшу йисан 21,4 агъзур гектар хутIлариан 95 агъзур тонна дюгю уч гъапIнийи, хъа цци гьамусдиз дургнайи 23,7 агъзур гектариан, саб гектариан 45 центнер уч апIури, 107 агъзур тонна дюгдин тахил уч дапIна.

Цирклиъ мицисдар ужудар хъуркьувалар республикайиъ мелиорация артмиш апIбаан кIули гъуху ляхнар себеб вуди гъахьидар ву. Дидланра савайи, гъи дюгю убзувал хайирлу ляхин вуйивалин гъавриъ ади, гъулан мяишатдин жара цирклариъ лихурайи карханйириъра «лизи дяхниз» (дюгдиз улихьган гьаци кIури гъахьну) фикир тувуз хъюгъра. Мисалназ, республикайиъ яркьуди машгьур вуйи, дулдурмйир ва йиккун консервйир гьясил апIру «Урицкий комбинат» ООО-йи 2019-пи йисхъан мина чан хутIлариъ дюгю убзура. Цци карханайи 800 ц кьадарнаъди сабпи бегьер уч гъапIну.

Карханайин кIулиъ айидар гележегдиъ дюгю тартиб апIру завод тикмиш апIбанди ву.