Дишагьлийирик гьарган, тувундарчуз, гъилигундарчуз, гъабхьундарчуз кIури, аьрзйир кади шулу.
Гьаму кьанди Хив райондиз хялижвди гъягъюрайири, машинра ичIиди айивализ лигну, кьюр хпир итунза. Саб бицIиди рякъ ккадапIган, дурари узухъди лезги чIалниинди гафар апIуз хъюгънийи. Узуз гизаф ужуди лезги чIал аьгъяшра, дурариз лезги чIал аьгъдарзуз, дидин гъавриъ ахърадарзу дупну, сар-сарихъди урус чIалниинди гафар апIуз хъюгънийча. Му дишагьлийири чпин ччвурар Селми ва Зейнаб вуйич, АрхъитI гъулаз майлин сумчриз гъягъюрайидар вуча кIури, мялум гъапIнийи.
Машиндин кьялхъяну сидениейиин дуснайи дишагьлийири саб арайилан чпи сумчриъ гьапIуз ккаш, пешкешди фу гъабхураш, сар-сарихьан гьерхуз хъюгъю. Селмийи, сумчриъ агъзур манат пул дипдиза, улар йитIруси, 300-400 манатдин шабашра апIидиза, саб кило гьяфатарра, саб филан-вуш сундхиъ ади, йиз шубар-швушвариз гьяспикк кадру парчайин кьатIра хьазухь, гъапи. «Лап дюз кIурава, узура гьаци фикир апIурайза. Бика чавра думукьан юкIв абгрур дар, хътубтIур, кьискьис ву», – рази гъахьи чан сюгьбатчийин гафариин Зейнабра. Учу АрхъитI гъулаз хъуркьиган, эгер учву сумчриан кьяляхъ хътакуз ккайидар вуш, хьябяхъдиган узура кьяляхъ гъюрур вуза кIури, йиз рякъюн юлдшариз мялум гъапIза. Ав, ав, учура гъюрча дупну, дурари узухьна чпин телефондин номер туву ва, уву кьяляхъ гъюриган учуз дих апIин кIури, тIалаб гъапIу.
Хябяхъган, зенг дапIну, сумчриан гъюрайи Селмира, Зейнабра машиндиъ итну, кьяляхъ рякъюъ учIвча. Саб арайилан Селмийи: «ГьапIрур вуш, му, хьябяхъганра кьяляхъ гъюрур вуза кIури, чаз пассажирар агурайи таксистсир ву. Ихь чIалра аьгъюр дарди, рякъюн кьиматнан гьякьнаан мугъахъди гафарра апIуз читинди хьибди, гъилигиган, багьа кьиматар кIурурсирра ву. Сумчриз хузра, кьяляхъ гъахузра гьарури 300 манат тувну гъибтдихьа», – кIури, Зейнабди гьеле чаз сумчриан фу тувнаш, лигуз, пакет рибгъуз хъюгъю.
– Агь! Уву гашу йикIриву, кьискьис! Яв баят ибшрияв, ярхла рякъюъди дуфнайи узу, гьамрар хьади кьяляхъ гьауз нач гъабхьундайкIан?! Я риш, мюгьтал гъахьиза, – гъапи дугъу хъял кади.
– Рякъяризра, сумчриъ шабшаризра гьамкьан пул харж дапIну, узуз ивнайидар саб сокна читдин парчана гъидикьнайи жюрбежюр гьяфатар ву, гъапи Селмийи.
– Узузра кьискьисри тувнайидар гьадрар ву, магьа лиг, – кIури, Зейнабди чан пакет Селмийихьинди дипу. Белижийиъ рякъ илтIибкIру йишвахьна учу кьяляхъ хъуркьиган, узу лезги чIалниинди, рякъин пул тувуб герек дар, хъа учву гъубхубдиз, гъапIубдиз гъилигиган, сумч-риан гизаф ужуб пакет тувунчвуз, гъапиган, дурар, мюгьтал духьну, чпи беябур гъахьивалиан фукIа кIуз даршули, сар-сарихьинди лигури дийигънийи.
Гьаддиз, сумчриз агъзур манат пулна кило гьяфатар духну, кьяляхъ гъюруган швувшахъ хъайи, абцIнайи сундух тувундарзуз кIури, гиран дапIну ккундар. Белки, сумчрин эйсийи чан дюз гъюруганси тувуншул. Сифте жвуву фу гъабхураш дилигну, хъасин, тувундар, гъапIундар, дупну ккунду.
