РД-йиъ айи Роспотребнадзорин управлениейи сар касдикан тмунурикна тарагъру жюрбежюр иццрушнарин профилактика апIбаз диш дапIнайи вари жягьтлуваларин терефар уьрхюра. Гьаци, вари дюн’яйиъ ВИЧ-СПИД-дихъди женг гъабхру йигъан – 1-пи декабриъ социалинна культурайин жягьтлуваларин фондну #СТОПВИЧСПИД кIуру акция кIули гъубхну.
Думу акция ВИЧ-инфекцияйин профилактика апIбаз ва агьалйириз му уьзрикан мялуматар тувбаз бахш дапIнайиб вуйи.
Дагъустандиъ айи Рос-потребнадзорин управлениейи, ВИЧ-инфекцияйин профилактика апIбан месэлйириан мялуматар тувувал метлеб вуди, #СТОПВИЧСПИД акцияйин дахилнаъди 2020-пи йисан 26-пи ноябриан 4-пи декабриз «убцру линия» абццнийи, ва агьалйирихьан, зенг дапIну, уьзрихъди аьлакьалу месэлйирин гьякьнаан консультация гъадабгъуз шуйи. Мидланра гъайри, Роспотребнадзорин консультацйир тувру уьмуми центрин 8 800 555 49 43 телефондизра гьар йигъан йишвнура, йигънура фунуб вушра вахтна зенг апIуз шулу.
Роспотребнадзорин пишекрари ВИЧ-СПИД уьзрарин профилактика апIбакан, му уьзрин хатIалувалихьан жвув фици уьрхюруш, сар касдизра ашкар даршлуганси ва пулсузди тестирование наан гъабхуз мумкинвал аш, региондиъ ВИЧ-инфекцияйихъди аьлакьалу аьгьвалат фициб вуш ва жара суалариз жавабар тувру.
Къайд апIуз ккундузузки, 2019-пи йисан аьхириз вари дюн’яйиъ ВИЧ-инфекция кайи 38 миллион инсан яшамиш шулайи. Гъубшу йисан СПИД-дихъди аьлакьалуди арайиз гъюрайи жара уьзрариан 690 000 инсан гъийихну. ЮНЭЙДС-дин мялуматариинди, ВИЧ-дин инфекцияйин сабпи дюшюш арайиз гъафихъан мина ва дидин гюзчивал гъабхурайи вахтнан арайиъ дюн’яйиъ му уьзриан 75,7 миллион инсан аьзарлу гъахьну, 2019-пи йисан аьхириз думу кьадарнакан ВИЧ-СПИД уьзрихъди алакьалу вуди 32,7 миллион инсан кечмиш гъахьну. Думу уьзур фукьан ухди ашкар гъапIиш, гьадмукьан ухди ВИЧ-инфекция сагъ апIбаз хайир- лу гам хьибди. Вахтниинди гъапIу антиретровирусдин терапияйи инсандин имунный гъурулушдиъ вирус тарабгъувал къайдайиъ уьбхюз мумкинвал тувру.
