ЦIийиди ачмиш гъабхьи коронавирусдин уьзри, 2020-пи йисан эвелариан башламиш дапIну, жямяаьтлугъ уьмур хъапIбан рякъяр дибдиан дигиш гъапIну гъапишра, кучIал шулдар. Му уьзрихьан инсанар уьрхбан бадали, дидиз аькси серенжемар гъахувал гьюкмин асас месэла гъабхьну.
Дагъустандин Главйин вазифйир тамам апIурайи Сергей Меликовдин регьберваликкди гьаму йигъари кIули гъубху гьяракатнан совещаниейиин Хив райондин гдава Ярмет Ярметовди субут гъапIганси, Хив райондин агьалйир му уьзрихьан уьрхювал райондин улихь-кIулихь хьайидарин гьар йигъандин месэла дубхьна. Шагьрарихь ва саб жерге районарихь тевиш, Хив райондиъ я сумчрар, ясана жара шадлугъар гъахру залар, я инсанар гизаф кьадарнаъди гъварч хьпаз мумкинвал айи жара идарйир адар. Гьаддиз райондиъ аьгьвалат гюзчиваликк уьбхюзра думукьан гъагъиди алабхъурадар. Райондин кIулиъ айидарин ва республикайин муфтиятдин табшуругъар тамам апIури, йишвариин мистарин имамарира му жигьатнаан агьалйирихъди гъаврикк ккаъбан ляхин гъабхура.
«Кьабул гъапIу уьлчмйирин натижайиъ улупнайи вахтназ Хив райондиъ коронавирус уьзрихъди аьлакьалу гьякьикьат хайлин саламатуб дубхьна. Райондиъ вари мектебар ва бицIидарин багъар, агьалйирин игьтияжар гьуркIбаъ кьувватнаъ айи саб жерге идарйир, уьзриз аькси къайдйир уьрхюри, аьдатниинди лихура. Вушра, гьелелиг архаинвализ мюгьлет тувуз шулдар. Фицики уьлкейиъ аьгьвалат гъагъиди гъубзра.
Йишвариин агьалйирихъди Роспотребнадзорин ва сагъламвал уьбхбан гъуллугъчйири туврайи табшуругъар ва теклифар уьрхбан рякъ’ан гъаврикк ккаъбан ляхин сикин дарди гъабхбан чарасузвал гъубзра.
Агьалйириз чпин хулариъ имиди коронавирусдихъди аьлакьалу лазим мялуматар тувбан бадали, улихьна йигъари райондиъ «убцру линияра» ляхник кипнача. 89604158943 нумрайиз зенг дапIну, гьарсар касдихьан, учв ва багахьлуйир коронавирусдихьан уьрхбан бадали, хулаъ дусну имиди лазим вуйиб гьерхуз, жямяаьтлугъ му уьзрихъди аьзарлу апIбан хатIа айиваликан хабар тувуз шулу»,
– гъапну Ярмет Ярметовди.
Аьлава апIурза, улупнайи вахтназ Хив райондиъ COVID-19 уьзрихъди аьлакьалу аьгьвалат писуб дар. Апрелин эвелариан башламиш дапIну, ЦРБ-йиъ 5400-тIан артухъ касарик коронавирус каш ахтармишар духна. Уьзур тасдикь гъабхьи 235 аьзарлуйикан 218 кас сагъ гъахьну.
