Вари терефариан техникайин артмиш’валин гъизгъинвал арайиз дуфнайи гъийин заманайиъ аьлакьайин гъуллугъну агьалйирин уьмриъ метлеблу йишв бисура. Хъа гъябгъюрайи йисан, коронавирусдин уьзрихъди аьлакьалу вуди, уьлкейиъ кьабул гъапIу уьлчмйирин натижайиъ инсанар аьла-кьайин гъуллугънахьна лапра багахь гъапIну, фицики асас пай туканар ва аьлава игьтияжар гьуркIру гъуллугъар онлайн къайдайиинди лихувал кьувватнаъ абхъну. Натижайиъ аьлакьайин идарйириз ляхинра артухъ гъабхьну.
Йиз гъийин улхуб чан вазифйирихьна жавабдарвалиинди янашмиш шулайи, аьлакьайин гъуллугънан ужуб тажруба айи пишекар, Мягьярамкентдин поч-тамтдин Хив гъулаъ айи аьлакьайин идарайин отделениейин начальник Рашид Рашидовдикан гъябгъиди.
Хиварин аьлакьайин отделение чпин ляхнин вазифйир тешкиллуди албагнайи идарйирин улхьан жергейиъ улупуз шулу. Улупнайи вахтна душваъ, начальникдилан савайи, кьюр оператор ва юкьур почтальон лихура. Дурари Хив, Хирижв, Лика ва Ккугъ гъуларин агьалйирин игьтияжар гьуркIра.
– Деврин дигиш’валариз асас вуди, аьлакьайин гъуллугъчйирин улихьра хайлин вазифйир дивна. Гьадму гьисабнаан учу гьамусяаьт агьалйирин варждихьна жюрбежюр гъуллугъар гьуркIрача. Урусатдиъ чапдиан удучIвурайи жюрбежюр газатарин, журналарин подписка гъабхували, дурар вахтниинди агьалйирихьна рукьували ич ляхниъ асас йишв бисура.
Гьякьикьатдиъ алахьурайи читинвалариз дилигди, ляхин тамамвалиинди апIуз зегьмет зигурача. Вушра камиваларра гъузра.
Аьлакьайин идарйириъ гъабхурайи гьар йигъандин ляхникан гъапиш, учу гьар вазлиъ агьалйирин 3000-рихьна гъуллугъар гьуркIрача. Мушваъ агьалйирихьан гъубгу аквнахъан, газдихъан тувру гьякъи кьабул апIувал, агьалйирихьна жюрбежюр пособйир рукьувал ва жара терефар улупуз шулу.
Аьхиримжи вахтна ич кьувватар улубкьурайи йисаз подписка тешкил апIбаз сарф апIурача.
Айи мумкинвалар ишлетмиш дапIну, подписка гъабхбаъ учуз улупнайи планар тамам апIбиин зегьмет зигурача, вушра йислан-йисаз му рякъюъ читинвалар артухъ шула. Интернетдин мяднарин яркьувал себеб дубхьну, гъи фунуб хабарра аьгъю апIуз мумкинвал а. Натижайиъ агьалйири газатаризна журналариз подписка апIбаккан кIулар ккадагъура.
Чапдиан удучIвурайи жюрбежюр махлукьатлу хабрарин дакьатарикан кьатI’ди гъулхиш, Хив райондин агьал-йири, жара газатарихь тевиш, республикайин дережайиъди милли чIалниинди чапдиан удубчIвурайи «Табасарандин нурар» газат аьшкьниинди кьабул апIури шулу. Гьар подписка гъабхру вахтна, Хив гъулан аьлакьайин отделениейиъ улупнайи газатдин 250-300 экземпляр подписка апIури шулча. Му ражнура зегьмет зигурача, амма, райондин кIулиъ айидарин терефнаан кюмек дархьиш, улупнайи планар тамам апIуб гъагъиди алабхъура.
«Табасарандин нурар» газатдикан улхури, къайд апIурза, думу республикайин дережайиъди табасаранарин милли маракьар уьрхюрайи, халкьдин сурат улупурайи милли девлет, савкьат ву. Газатдихьна вуйи лигбарикан гъапиш, думу гъи хайлин артмиш дубхьна. Ухьуз, ихь халкьдиз айи кьувватар ва мумкинвалар сарф дапIну, думу уьбхювал гъи ихь буржарикан ву. Фицики, текрар апIураза, республикайин дережайиъди чапдиан удубчIвурайи газат – ихь милли девлет ву, – къайд гъапIнийи Р.Рашидовди.
