Мялум вуйиганси, январин 20-диъ Дагъустандиъ республика арайиз дуфну 100 йис тамам хьпаз тялукь шадлугъар кIули гъягъиди. Му тарихлу гьядисайиз тялукь вуди, улубкьнайи 2021-пи йис вахтназ вуди РД-йин Главайин вазифйир тамам апIурайи Сергей Меликовдин Указдин бинайиинди Дагъустандин Йисси мялум дапIна.
Улупнайи Указ йишвариин тамам апIбан бадали, Хив райондиъра маракьлу программа кьабул дапIна. Дидиз асас вуди, му йисан райондиъ хайлин серенжемар кIули гъахиди.Улупнайи Указ йишвариин тамам апIбан бадали, Хив райондиъра маракьлу программа кьабул дапIна. Дидиз асас вуди, му йисан райондиъ хайлин серенжемар кIули гъахиди.
Шахматариан турнир
Гъябгъюрайи гьяфтайиъ Хиварин уьмуми образование тувру мектебдин бинайиинди кьувватнаъ айи «Точка роста» илимдин центриъ мектебариъ урхурайидарин арайиъ «Лизи ладья» кIуру лишниккди шахматариан талитар кIули гъушну.Маракьлуди кIули гъушу талитариъ «ВаритIан ужур шахматист» кIуру ччвурназ Исмяил Асланов лайикь гъахьну. Кьюбпи йишв Нажмудин Жяфаровди ва Ислам Аьлипашаевди пай гъапIну. Гъалибчйирин жерге шубубпи йишв гъибису Авабег Аьбдуллаевди яркьу гъапIну. Гъалибчйир вари Хиварин мектебдиъ аьгъювалар гъадагъурайидар ву.
Милли палтарин выставка гъябгъюра
Дагъустан гьарсаб вахтна чан милли девлетлувалиинди ва сабвалиинди такабур ва машгьур ву. Амма, гьяйифки, саб жерге харижи уьлкйирин гьякьикьатдин тясирнаккди ихь халкьдин милли палатра тарихдиз гъябгъюра.«Гъи милли палат алабхьнайи дишагьли ясана жилижви кючйириъ хатIадира алахъуб мумкин дар. Тялукь аьгьвалатнаъ ухьу, наслариз милли палтарин гюрчег’вал улупну, думу палатдихьна жигьиларин арайиъ маракьлувал за апIуз зегьмет дизигну ккунду. ДАССР-ин юбилейин гъаншариъ учу ра-йондиъ айи Урусатдин аьдати меденият уьбхбан Центриъ дагъустанлуйирин милли палтарин выставка тешкил дапIнача. Дина гъюз гьарсар ватандашдиз раккнар ачухъ ву», – кIура Хив райондин администрацияйин культурайинна спортдин, жигьиларин месэлйириз лигру ва туризмдин отделин начальник Казбек Къазиевди.
Тарих уьбхбан бадали
«Ухьу тарихдиз тапанчийиан гъивиш, гележегди ухьуз тупраан йивиди» кIуру гафар кми-кмиди ерхьури шулу. Шаксуз, му келимайиз дерин мянара а.ДАССР-ин 100 йисандин юбилейихъди аьлакьалу вуди Хив ЦБС-диъ, гъуларин библиотекйириъ республикайин тарихдиз бахш вуйи китабарин выставкйир ачмиш дапIна. Душваъ гъулан гьарсар ватандашдихьан ихь дагълу уьлкейин тарихдихъди, гъийин гьякьикьатдихъди таниш хьуз шулу.
