Гъябгъюрайи йисан 1-пи сентябриз Дагъустандиъ Урусатдин Миноборонайин кьувватариинди 59 мектеб ва бицIидарин багъ тикмиш апIуз планламиш дапIна.

 

Дагъустандиъ тикмиш апIуз планламиш дапIнайи социалин инфраструктурайин тикилишарин месэла гьаму йигъари Мягьячгъала шагьриъ гъабхьи совещаниейиъ вахтназ вуди РД-йин Главайин вазифйир тамам апIурайи Сергей Меликовди ва РФ-дин Миноборонайин министрин заместитель Тимур Ивановди гьял гъапIнийи.

РФ-дин Президентдин къарариинди, «Демография» милли проектдин ва РФ-дин федералин «Образованиейин артмиш’вал» программайин социалин цирклин важиблу тикилишарин ляхнар кIули гъахру жавабдарси Урусатдин оборонайин министерство улупна.

Тимур Ивановди гъапиганси, къайд дапIнайи прог-раммйирин дахилнаъди Урусатдин Миноборонайин кьувватариинди яшайишдин важиблу 73 тикилиш дивра. Гьадму гьисабнаан, гъябгъюрайи йисан 1-пи сентябриз Мягьячгъала, Каспийск, Къизлар, Дербент, Избербаш, Буйнагъск шагьрариъ ва республикайин 23 райондиъ 59 дарамат тикмиш апIиди. Дурарикан уьмуми кьадар 6,8 агъзур ученик урхуз мумкинвал айи 13 мектеб ва 46 бицIидарин багъ ву. БицIидарин багъарикан 35 багъ сад йисна гьацIлан шубуд йис яш дубхьнайи бицIидариз ву.

Гъийин йигъаз 19 дараматдин, гьадму гьисабнаан 11 бицIидарин багъдин ва 8 яслийин тикилишчивалинна монтаждин ляхнар аьхирихъна гъюра. 25 ясли гъябгъюрайи йисан июндин вазлиъ ккудукIуз планламиш дапIна. Образованиейин 12-сан идара 1-пи сентябриз ккудукIиди.