27-пи январиъ Табасаран райондиъ айи «Газпром межрегионгаз Махачкала» ООО-йин идарайиъ, ерли гьюкмин органарин вакиларра иштирак духьну, райондиъ табиаьтдин газ ишлетмиш апIбан месэлйирин гьякьнаан агьалйир кьабул гъапIну.

 

Газдихъди аьлакьалу месэлйирин гьякьнаан гаф-чIал апIбан бадали, табиаьтдин девлет ишлетмиш апIурайи агьалйириз вахт ккимиди хабар дебккнайи.

Агьалйир кьабул гъапIур Табасаран райондин абонентарин участокдин кIулиъ айи Мягьяма Шабутаев вуйи. Хъа, агьалйирин аьрзйир сатIиди гьял апIбан бадали, му серенжемдиъ райондин прокурор Гъафлан Аьлимурадов, райондин ОМВД-йин начальник Насир Ягъибегов, Табасаран райондин главайин заместитель Заур Мусаев, райондин агьалйирин месэлйир гьял апIбан зиин ляхин гъабхурайи главайин кюмекчи Идаят Ибрагьимов ва райондин «Газпром межрегионгаз Махачкала» ООО-йин ЭГС-дин аьхюну мастер Мирзафер Шамсиев иштирак гъахьнийи.

Гюрюшдиз дуфнайи райондин агьалйирин асас аьрзйир кьюб вуйи – газ ишлетмиш апIбаан шулайи буржар ва думу буржар арайиз гъювалин къайда; кьюрдун вахтна агьалйирин хулаз гьубкIну газ дяргъюрайивал.

Кьюбпи месэла гьял апIувал Мирзафер Шамсиевди чан гюзчиваликкна гъадабгъну. Хъа буржарин гьякьнаан вуйи аьрзйириз лигувалин натижайиъ ашкар гъабхьиганси, му месэла абонентари газдихъан туврайи пул ва счетчикдин улупбар газдин гъуллугъназ вахтниинди тутруврайивалиан арайиз гъюра.