Гъубшу йисан аьхириъ РД-йин милли политикайин ва диндин ляхнариз лигру министерствойи, Дагъустан Республика арайиз гъафихъан мина 100 йис тамам хьпан юбилейиз бахш вуди, милли чIалариинди шиърар урхбан «Йиз гирами ватан – Дагъустан» кIуру конкурс гьяракатнаъ ипнийи.
Конкурсдиъ Урусатдин шагьрариъ, регионариъ яшамиш шулайи фунур касдихьанра иштирак хьуз шуйи.
Гъябгъюрайи йисан февралин эвелиъ жюрийи конкурсдин натижйир гъивну. Конкурсдиъ иштирак шулайидари шиир урхруган, жюрийи асас фикир чIал аьгъювалин вая дубгъурайивалин дережайиз, конкурсдин тема уьбхювализ, шиир урхбан къайдайиз, актервалин устадвализ ва гьацира жара шартIариз туври гъахьну. Жюрийин дахилнаъ милли чIалар аьгъю апIру Центрин директор Марина Гьясанова, республикайин «Табасарандин нурар» газатдин кIулин редактор Гюлягьмад Маллялиев, «Бабан чIаларин варитIан ужур мялим» республикайин конкурсдин гъалибчи Зарият Базаева, ДГУ-йин дагъустандин чIаларин кафед-райин мялимар ва жарадар айи.
Къайд апIуз ккундучуз, конкурсдиъ Санкт-Петербург шагьриъ яшамиш шулайи Аслан Клинжевди (шик-лиъ) табасаран чIалниинди гъурху багъри ватандикан вуйи шиъриз жюрийи варитIан заан кьимат тувну. Аслан Клинжевди мектебдин 1-пи классдиъ урхура. Санкт-Петербург шагьриъ культурайинна аьгъювалар тувру «Дагъустан» центриъ табасаран чIалнан дарсариз гъягъюри, Асландин кьюбпи йис ву.
«Узуз Дагъустан, ич гъул, абйир-бабар, йиз дустар гьаммишан кIваинди шулзуз. Табасаран чIалра аьхю аьшкьниинди дубгъураза. Табасаран чIалниинди шиърар урхбан конкурсариъ иштирак шули, кьюбпи раж вуйиз. Сабпи шиир адашдикан вуйи. Думу гъубшу йисан бабан чIалариз бахш вуйи Йигъан гъурхнийза. Дагъустандин милли политикайин ва диндин ляхнариз лигру министерствойи тешкил гъапIу конкурсдиз узу ич мялим Зубайдат Шябановайи гьязур гъапIну. Жюрийи, шиир урхруган конкурсдин иштиракчийи алабхьнайи милли палатра гьисабназ гъадабгъурайи. Адашди Дагъустандиъ яшамиш шулайи багахьлуйирихьан Гьябиб Нурмягьямедовдинсиб бачукI хътапIуз мумкинвал аш, гьерхнийи. Думу бачукI учухьна конкурсдин заявк-йир кьабул апIру аьхиримжи йигъан гъурубкьнийи. Гьадму йигъан гьяракатниинди хябяхъдиз шиир минис-терствойин сайтдиз хътапIнийча. Узу гъалиб шулу кIури, затра миж ктайиз, фицики конкурсдиъ узухъди табасаран чIалнан дарсариз гъюрайи швнур-сар балина шуру иштирак’вал гъапIнийи. Ва дурарра бегьем гьязур шулайи. Му сар узуз ваъ, вари ич табасаран классдиз туву кьиматси гьисаб апIураза. Му ляхин варидари сабси къайдра апIурча»,
– гъапнийи Асланди.
Конкурсдиъ авар, дарги, нугъай, къумугъ, азербайжан, лезги, лак чIалариинди шиърар гъурхдарин арайиъра гъалибчйир гъядягъну. Конкурсдин гъалибчйир ва иштиракчйир багьалу пешкешариинди ва дипломариинди лишанлу апIиди.
