Гьаму йигъари Владикавказ шагьриъ армияйин хиларихьди кчIихбарин спортдин жюрейиан кIули гъубшу Кьибла военный округдин чемпионатдиъ ихь ватанагьли Асхаб Сефербеговди 75 кило гъагъ айи спортсменарин арайиъ гъалибвал гъадабгъну.

 

Асхабдин сарпи тренер Мартин Сефербеговди ич сюгьбатнаъ къайд гъапIганси, Асхаб спортдиин байвахтнаан мина машгъул вуйи. Думу Табасаран райондин ЧвулатI гъулаъ бабкан гъахьну.

«Сифте узу Асхаб Дарвагъ гъулаъ ерлешмиш дубхьнайи мектеб-интернатдин дахилнаъ айи спортдин зализ спортдин юкьяр дисбан кчIихбарин жюрйириан аьгъювалар гъадагъуз гьаънийза. Гьаддихъди сабси, думу гьадму вахтнаан мина спортдин хиларихьди кчIихбан жюрйириинра машгъул гъахьнийи. Улихьна йисан Асхаб контрактдин къайдайиинди Волгоград шагьриъ военный гъуллугъназра гъушну. 4-5 февралиъ думу Кьибла военный округдин хиларихьди кчIихбарин талитариъ чемпион гъахьну. Чемпионатдиъ 60-рилан 85 ва артухъ кило гъагъ айи 7 категорйириан варжтIан артухъ спортсмен иштирак гъахьну.

Чемпионатдин натижйириинди Кьибла Военный округдин сатIи вуйи команда тешкил гъапIну.

Чемпионвалин ччвурназ лайикьлу хьайиз, Асхабди думу талитариъ 5 спортсмендихъди кчIихбар гъурхнийи ва вари талитариъ гъалиб гъахьну. Узу, тренериси, дугъан хъуркьувалариз заан кьимат тувраза. Гележегдиъ Асхабдиз ужудар мумкинвалар ва хъуркьувалар шлувалиинра умудлу вуза»,

– къайд гъапIнийи Мартин Сефербеговди.

КIваин апIуз ккундучуз, Асхаб Сефербегов спортдин хиларихьди кчIихбарин жюрйириан швнуб-саб ражари Дагъустандин, хъа 2019-пи йисан ММА-йиан вари Урусатдин чемпион гъахьну.

Мартин Сефербеговди спортдин жюрбежюр кчIихбарин жюрйириан швнур-сар чемпион гьязур гъапIну. Гьамусяаьтра дугъахь чан багъри гъулаъ спортзалиъ ЧвулатI, СиртIич, Гюгьрягъ гъулариан 40-рихьна жигьилари спортдин кчIихбан жюрйириан аьгъювалар гъадагъура. Дурарин арайиъра гележегдин чемпионар айивалиин умудлу вуча.