Мялум вуйиганси, инсанарин рюгьнан кьувват ккабалгбаъ СМИ-йин дакьатари аьхю роль уйнамиш апIура.
Жиниб дар, гъи цIийи технологйирин девир дуфна: агьалйирихьна фунуб мялуматра ккуни саягъниинди ва ккуни терефнаанди рубкьбаз гизаф рякъяр ачухъ ву. Мялуматра гьарсар касди чан уьмрихьна вуйи лигбариз асас вуди кьабул апIура.
Федералин телеканалариан инсанарихьна рукьурайи мялуматарин гъизгъинвал, саб жерге передачйирин чиркинвалар фикриз гъадагъиш, яшайиш дагълу аьдатариинди ккабалгнайи жямяаьтлугъдиз йишвариин арайиз дуфнайи гьякьикьат улупбан, дагълуйирин багьалу аьдатар уьрхбан жигьатнаан ерли телевидениейи важиблу роль уйнамиш апIура.
Хив райондин милли телевидение кьувватнаъ ади, 5-пи февралиъ 20 йис тамам гъабхьну. Фикир тувиш, думукьан аьхю муддат дар, амма гьадму саб вахтна, дидин гьякьикьат фикриз гъадабгъиган, му юбилей райондиз саб хъуркьувал ву.
Юбилейин йигъан Хив ТВ-йин гъуллугъчйир му шаду йигъахъди Хив райондин глава Ярмет Ярметовди тебрик гъапIну.
«Ухьу вари азад вахтна ерли ТВ-йиз аьхю аьшкьниинди лигурахьа. Инсанарин маракьар жюрбежюрдар ву: сариз политикайин хабрар маракьлу ву, тмунуриз – мукьмарна ялхъвнар, шубурпириз – сериалар. Райондин ТВ-йин вакилари, вари тIалабарна лигбар чпин фикриз гъадагъну, ляхин ккабалгна.
Гьелбетда, 20 йис улихьна вуйи тамашичйиринна гъийин жигьиларин уьмрихьна вуйи лигбар асла жарадар ву. Жигьилариз, ачухъди кIурхьа, йишвариин гъягъюрайи гьяракатар, хиял апIин, маракьлу дар. Гьамусяаьт фуну мялуматра телевизориан улупайиз, интернетдин мяднариан ухди аьгъю шула.
Деврин саб жерге тIалабар фикриз гъадагъну, ухьу райондиъ, цIийи йислан башламиш дапIну, IP-телевидение гьяракатнаъ ипнахьа. Му аьхю хъуркьувал ву.
Юбилейихъди тебрик апIури, телевидениейин гъуллугъчйириз сифте нубатнаъди мюгькам сагъ’вал ккун апIураза. Гъит учвкан ихь райондин жямяаьтлугъдиз анжагъ шаду, маракьлу ва хайирлу мялуматар ерхьри»,
– гъапнийи райондин главайи.
Улупнайи муддатнаъ ТВ-йи гъапIу ляхникан улхури, ерли телевидение ачмиш гъапIу йигълан мина ду-шваъ мухбирди лихурайи Илдирим Рамазановди чпиз алахьу читинваларикан, хъуркьуваларикан, гъийин гьякьикьатдикан ктибтну.
– Телевидение ачмиш апIруган, учуз райондин газатдин идарайиъ саб кабинет жара гъапIнийи. Душваъ репортажарра гьязур апIури, кьяляхъна монтажра апIури гъахьунча. Эфириз дикторра гьадму кабинетдиъ, вахтназ улихьна гьязур духьну, удучIвуйи. Жикъиди, ТВ-йин вари ляхин гьадму саб кабинетдиъ гъабхури гъахьунча.
Кадрйирикан гъулхиш, кьюр мухбирра, кьюр операторра, монтаж апIру касра, дикторра айи. Гьелбетда, вари ляхин ТВ-йин аьхюрин гюзчиваликк гъабхьну. Ляхин ужуб гьаракатниинди кьувватнаъ абхънийи. Агьалйирихьан чпин багахьлуйириз вуйи тебрикнан гизаф кагъзар, мялуматар гъюри гъахьну.
Тяйин вахтналан, кризисдихъди аьлакьалу вуди, уьлкейиъ шулайи саб жерге дигиш’валарин натижайиъ ич ляхинра дигиш гъабхьну. Аьхиримжи вахтна ТВ-йин ляхин сар мухбирина сар оператори кIули гъабхурайча. Гьаму йисан эвелариан сарсана мухбир дуфна. Гьамус IP-телевидениера дубхьна. Гьелбетда, уж’валнан дигиш’валариин ухьу рази вухьа. ТВ-йин ляхин думу тешкил гъапIу йисариси хъанара кьувватнаъ абхърувалик умуд киврухьа, – аьлава гъапIну дугъу.
Хив райондин телевидениейин вакилар му бицIи юбилейихъди тебрик апIури, дурариз ляхниъ хъуркьувалар ккун апIурхьа. Гъит райондиъ маракьлу мяракйир артухъ ишри!
