Дагъустандиъ коронавирусдиан аьзарлу шулайидарин кьадар цIиб хьувалихъди аьлакьалу вуди, 65 йис ва думутIан артухъ яшар духьнайи касар ляхниз удучIвувализ дивнайи къадагъа алдабгъну. Дидин гьякьнаан вахтназ вуди Дагъустандин Главайин вазифйир тамам апIурайи Сергей Меликовди 9-пи февралиъ мялум гъапIну.

 

 

«Къайд апIурача, аьзарлуйир гьар йигъан больницйириз илтIикIури ашра, дурарин кьадар цIиб шула. Мисалназ, саб ваз улихьна гьар йигъан ва йишван 150-160 кас аьзарлу шулайиш, гъи думу улупбар 80-75 касдиинакьан ис духьна. Гьаддиз 65 йис ва артухъ яшар духьнайи касар ляхниз удудучIвбан гьякьнаан цIиб улихьнаси кьабул дапIнайи къайда батIул апIурхьа, имбуну къайдйир гьелелиг айиси гъитрахьа. «Гьяйифки, жара къайдйир буш апIуз шлу жюрейин улупбарихъна дуфнадархьа»,

– мялум гъапIну республикайин кIулиъ айири.

Сергей Меликовди, агьалйирикан вакцинацияйихьна вуйи чпин лигбар дигиш апIувал ккун апIури, вакцинаяйи ихь ва ихь багахьлуйирин сагъламвал уьбхюз кюмек тувруваликан гъапнийи.

Аьхиримжи улупбариинди, республикайиъ 11-пи февралиъ коронавирусдиан 70 кас аьзарлу гъахьну. Уьмумиди гъадабгъиш, Дагъустандиъ вари 28 810 касдик коронавирусдин уьзур кубчIвну, 26 259 кас сагъ гъахьну, гьамусяаьт 1266 кас уьзрихъди женгнаъ а, 1285 кас гъийихну.

Республикайиъ COVID-19 уьзриз аькси вакцинайин рубар йивбан ляхин давам шула. Руб йивайиз, духтрари гьарсар касдин сагъламвал ахтармиш апIура.
Гъийин йигъаз Табасаран райондиъ 200 касди «Спутник V» вакцинайин рубар гъивну.

Хив райондин кьялан больницара агьалйириз вакцинайин рубар йивуз гьязур дубхьна. Вакцина уьбхру холодильный камера дубхна, вакцинайин 10 дозара жара дапIна, хъа гьеле вакцина райондиз дубхнадар. Хив райондин администрацияйин 25-тIан артухъ гъуллугъчйир, анализар тувну, вакцинайин руб йивуз гьязурди а.