Артмиш шулайи наслар рюгьлувалин, ватанпервервалин гьиссариккди тербияламиш апIбан месэла гъийин девриъ важиблуб ву.

 

Ав, улупнайи месэлайин зиин лазим вуйиганси ляхин гъабхбан бадали, йишвариин саб жерге уьлчмйир кьабул апIура. Гьадму гьисабнаан жавабдар вакиларин сиягьра бицIиб дар, амма, гьаци вушра, гьякьикьатдиъ алахьурайи саб жерге гьяракатари субут апIурайиганси, аьгьвалатну архаин хьуз мюгьлет туврадар.

Уьлкейин тарихнахьна илтIикIиган, диди ухьуз нубатнан ражари ихь абйири гьюкуматдиз харжи терефариан хатIа айи жюрбежюр вахтари улупу гьунарарин, игитвалин важиблувал субут апIура. Абйирин гьунарар, дугъриданра, аьсрариз даимлугъ ву.

Игитарикан вуйи фикрар марцциди уьрхбан, думу гьунарарикан живанариз мялуматар тувбан метлебниинди Ватан уьбхрударин Йигъан гъаншариъ Хив райондин мектебариъ «Игитар кIваин уьрхюрхьа», «Гъалибвалин кагъаз», «Аферин йип гьарсариз», «Армияйиан чемодан» ва саб жерге аьлава серенжемар кIули гъурхну.

Улупнайи серенжемарин дахилнаъди урхурайидари, вахтназ улихьна гъуларилан илдицну, йисариинди абйирихьан хулариъ гъузнайи дявдин шей’ар, шиклар уч дапIну, мектебариъ ватанпервервалин мурччвар ккабалгну. Дидланра савайи, живанари гьамусяаьт уьлкейин жюрбежюр пIипIариъ ватан уьбхбан гъаразнаъ ади дявдин гъуллугъ гъабхурайи ватанагьлийириз машквриз тебрикнан кагъзарра хътаъну.