Гьар ражари, Ватан уьбхювал герек гъабхьи вахтна, дагъустанлуйири чпин дирбаш’вал улупури гъахьну. Дурарин арайиъ табасаран баярира лайикьлу йишв дибисна. Гьадрарикан сар Росгвардияйин отставкайиъ айи офицер, хусуси метлеб айи жюрбежюр операцйирин иштиракчи Тельман Ражабов ву.
Тельман Ражабов Хив райондин нагълариан ухьуз ужуди таниш вуйи ВертIил гъулаъ бабкан гъахьну. БицIи гъулан аьхю юкIв айи агьалйири чпин девриъ Надир-шагьдин кьушмарихъди дявйир гъухну, гизафдар Ватандин Аьхю дявдиъ иштирак гъахьну.
Байвахтна, вари чан таяризси, Тельмандизра, милицияйиъ лихури, Ватандиз гъуллугъ апIуз, тахсиркрарихъди женг гъабхуз ккундийи. Мектеб ужудар аьгъювалариинди ккудубкIну, думу ватандаш буржи тамам апIуз Яракьлу кьувватарин жергйириз гъушну. Армияйиан гъюблан кьяляхъ, гъунши Чечен Республикайиъ саламатвал адрувализ дилигди, Тельман Ражабов, контрактдиин къул дизигну, дявдин гъуллугънан пишекар гъахьну. Взводдин командирин заместителди лихури, Чечен Республикайиъ кIули гъубшу дявдин ветеран гъахьну. Дугъу 2003-пи йисан Урусатдин МВД-йин ВВ-йин Пермь шагьрин дявдин институтра ккудубкIну.
Дирбаш эскрин улихь командованиейи жавабдар месэлйир дивуйи. 2004-пи йислан ккебгъну, Тельман Ражабов ротайин командирди, хъа 2006-пи йисхъан 2012-пи йисазкьан хусуси метлеб айи операцйир гъахру командирин заместителди гъилихну.
«Дявдин гъуллугънаъ айи вахтна пашманвалин дюшюшар гизаф алахьунзуз, – кIваин апIура Тельман Ражабовди, – хъа машкврин улихь думу дюшюшар кIваин апIуз ккундарзуз. Хусуси метлеб айи саб операцияйикан ктибтурза. 2009-пи йисан Къарабудагъкент райондин Кьакьашура гъулхьан ярхла дарди ерлемиш дубхьнайи ярквраъ ич дестейи бандитарин десте кьялаъ тIапIнийи. Бандитар учхьан 200 метр манзилнаъ саб ямаж кайи, хъюрхълар айи йишвахь жин духьнайи. Ич метлеб – дурар йисирвализ гъадагъувал вуйи, амма бандитар лап ужуди яракьламиш духьнайи ва дяви дарапIди ич хилиз гъюбанди дайи. Йишвну ул иливну гъаахундайча. Ахсрар ккиврайи, акушин алабхьурайи. Саб арайиъ рукар-кюлерин сесер гъахьи. Ич десте бандитариин цIа уьлюбхюз гьязур гъабхьнийи. Лигуруш, рукаригъян мина юкьуб чIурдин сил гъюдучIвуру. Кьяляхъди гъюрайи сил узхьан хьуб метр манзилнаъ дийибгъну: «Учвуз нивкI гьаз адарчвуз, чIурдин нахшрариз сикинвал гьаз туврадарчва?» – кIуруси, узухьинди гъилибгнийи. Думу сил лап ужуди кIваинди имизуз… Бандитарин десте кьялаъ тIапIну, шубуд йигъ гъабхьнийич, натижайиъ дурар терг гъапIнийча».
Чан ихтилат цIибдиси дебккну, офицери давам гъапIнийи: «Узу Ватандин саламатвал уьбхбак йиз лайикьлу пай кивунза, Ватандин улихь йиз буржи тамам гъапIунза».
«Табасарандин нурар» газатдин редакцияйи Тельман Ражабовдиз жандин сагъ’вал ва дявдин фигъан адру ислягь умур ккун апIура.
