28-пи февралиъ Мягьячгъала шагьриъ ерлешмиш дубхьнайи «Ас-Сафра» кIуру деккуйиан йивру спорткомплекс-диъ Табасаран райондиан республикайин меркездиз кючмиш духьнайи агьалйирин арайиъ деккуйиан йивбан талитар кIули гъушну. Му серенжем, ДАССР-ин 100 йис хьпаз бахш вуди, ДРОО «Табасаран райондин жигьилар» жямяаьтлугъ тешкилатди тешкил гъапIуб вуйи.

 

Тешкилатдин председатель Муса Гьябибовди узуз туву мялуматариинди, талитариъ 40-тIан артухъ ихь ватанагьлийир иштирак гъахьну. Табасаран райондин главайин заместитель Аьбдулгьялим Гьялимовди райондин администрацияйин терефнаан серенжемдиз уч духьнайидариз саламар гъапIну ва хъуркьувалар ккун гъапIну.

«Иштиракчйир уч хьайиз вахт ккимиди учу, тешкилатчйири, мина дуфнайидариз меълишнарихъди убццру чайра гьязур дапIну, гъибтнайча. Му жюрейин серенжем тешкил апIури, сабпи раж вуйич. Жигьилар талитариъ аьхю аьшкьниинди иштирак гъахьнийи ва, финализ удучIвбан бадали, кьюб сяаьтна гьацIаъ гизаф маракьлу женг кIули гъубхнийи.

Талитар тешкил апIбаъ узухъди сабси зегьмет гъизигдариз ва ду-шваъ иштирак гъахьидариз варидариз чухсагъул мялум апIураза»,

– аьлава гъапIнийи Муса Гьябибовди.

Талитариъ 1-пи йишв Халагъ гъул’ан вуйи Сафар Манафовди, 2-пи йишв ХустIил гъулан агьали Мурад Халимбеговди гъазанмиш гъапIну, хъа 3-пи йишван сагьиб СиртIчан вуйи Рамазан Келбисиев гъахьну. Дурар вари медалариинди, пулин пешкешариинди ва тялукь грамотйириинди лишанлу гъапIну.