Чвйир Шагьид ва Мягьсуд Мягьямедселимовар Санкт-Петербургдиъ спортдиин машгъул вуйидарин арайиъ мялум дарур гьеле-меле адаршул. Гьеле мектебдиъ урхури имишра, дурар Санкт-Петербург шагьрин тереф уьбхюри швнуб-саб ражари спортдин юкьяр дисбан жюрейин кчIихбарин талитариъ, Урусатдиъ заан йишварин сагьибар гъахьну.
Мягьямедселимоварин ата-бабйир гьадму саб вахтна Табасаран райондин ФуркIил гъул’ан Хючназ кюч гъахьнийи. Хъа дурарин тухмиан вуйи Закир Мягьямедселимов гъи чан хал-хизандихъди Санкт-Петербург шагьриъ яшамиш шула.
«Санкт-Петербургдиз учу 2010-пи йисан удучIвну гъушнийча. Спортдиин машгъул шлуган Шагьиддин 9 йис, хъа Мягьсуддин 5 йис вуйи. Дишди гъапиш, узура спортдиин гизаф юкIв алир вуза. Гьадму саб вахтна, хайлин йисари волейболиан Табасаран райондин ва Дагъустандин тереф уьбхюри, талитариъра иштирак гъахьнийза. Веледар узу сифте спортзализ хъади гъягъруган, юкьяр дисбан кчIихбариан саб вазлин арайиъ аьгъювалар гъадагъну, дурариз кьабул дархьиш, спортдин жара жюрейин клубдиз гъягъбан йикьрар гъахьнийич. Амма кьюб гьяфта гъябгъяйизра, узхьан дурар спортзалиан адагъуз даршули гъабхьунзухьан. Гьамусяаьт дурари гьяфтайиъ 6 йигъан тренерарин гужли тIалабариинди Санкт-Петербургдин гьюкуматдин бицIидаринна живанарин олимпийский резервдин спортдин мектебдиъ ва шагьриъ авазнан «Легион» спортклубдиъ аьгъювалар гъадагъура», – ктибтура спортсменарин адаш Закир Мягьямедселимовди.
Шагьид юкьяр дисбан спортдиан Санкт-Петербургдин сборный командайиз гъадагъна. Дугъу улихьна йисари Москвайиъ, Кабардино-Балкарияйиъ, Нижний Новгороддиъ, Карелияйиъ, Кафари Осетияйиъ гъахьи Урусатдин мектебдиъ урхурайидарин спартакиадйириъ ва жюрбежюр чемпионатариъ заан йишвар гъадагъну. Гъубшу гьяфтайиъра юкьяр дисбаан думу Санкт-Петербургдин чемпионатдиъ иштирак гъахьнийи. Гьадушваъ Шагьидди кьюбпи йишв гъазанмиш гъапIну (56 кило гъагъ). Хъа гьадму чемпионатдиъ клубарин арайиъ вуйи талитариъ Мягьсуд 42 кило гъагънан категорияйиъ сабпи йишван сагьиб гъахьну. Шагьид, гъубшу йисан Москвайиъ гъабхьи спартакиадайиъ ужудар натижйир улупбаз лигну, спортдин мастериз кандидатди улупна.
Хьадан вахтна чвйир багъри ватандизра гъюри шулу. Шагьидди ва Мягьсудди мектебдиъра ужудар аьгъювалариз урхура. Шагьид гьамусяаьт 11-пи классдиъ а, ва дугъу Урусатдин МВД-йин академияйик кучIвуз ният дибисна. Гьадушваъра дугъу спортдин рякъ давам апIиди.
«Спорт инсандин сагъ’вал, беден кьувватлу апIурайи важиблу циркил ву. Диди инсандин хасиятра ижми апIуру, инсанарин цIарнаъ улихь гъягъюз, жямяаьтлугъдин ва жвуван таярин арайиъ гьюрмат гъазанмиш апIуз гъитру. Ихь веледарин хъуркьуваларикра спортди аьхю пай кивра. Узу гьаддиин инанмиш гъахьунза ва вари йиз юлдшариз, ватандашариз, мумкинвал аш, веледар спортдиин машгъул апIбахьна дих апIураза. Дийибгънайи штуз ва гъябгъюрайи нирин штуз фикир тувай. Инсандин беденра гьаци ву. Абйир-бабари сабсана важиблу терефназ фикир тувну ккунду. Саб вахтнара веледдихьди чан юкIв ктрабсру вая чаз кьабул дару, чахьан удудукьру ляхин гужниинди тамам апIуз гъитну ккундар. Сариз футбол кьабулди шулу, тмунуриз сирнав йивуз вая кчIихуз. Гьаддиз, сифтена-сифте веледдиз чаз ккуни жюре ктабгъуз мумкинвал тувай. Хъуркьуваларихъна гуж апIували ваъ, машгъул духьнайи спортдин жюрейиин юкIв аливали ва аьшкьну хуру», – гъапну ич сюгьбатнаъ Закир Мягьямедселимовди.
Дугъан гафарихъди учура рази вуча.
