2020-пи йисан Табасаран райондин администрацияйи 11 йитимариз хулар гъадагъуз пулин дакьатарин кюмек тувну. Гьаму мялумат 26-пи февралиъ Табасаран райондин администрацияйин актовый залиъ райондин депутатарин Собраниейин ургубпи дих апIбан хьубпи заседаниейиъ райадминистрацияйин мал-мутмийихъдина жилихъди вуйи аьлакьйирин отделин начальник Руслан Аьзизовди ашкар гъапIну.
Дугъан гафариинди, гьамусяаьт Табасаран райондиъ 114 кас абйир-бабар хътру йитимар хуларин нубатнахъ дийигъна, дурарикан 20 кас – 14-18 йисаъ айидар; 44 кас – 18-23 йисаъ айидар; 50 кас – 23 йислан зина яшар вуйидар. 2020-пи йисан Табасаран райондин администрацияйи, «Гьюкуматди йитим бицIи-дариз туврайи гъулай хулар» муниципалин программайин дахилнаъди хулар гъадагъбан бадали, 6 174 993 манат пул харж гъапIну. Дурарикан 3 368 178 манат – РД-йин бюджетдиан, 2 806 815 манат федеральный бюджетдиан жара дапIна. Гьаци, 2020-пи йисан яшамиш шлу хулан 1 квадратдин метрин кьимат 17011 манат гьисаб шула, 2021-пи йисанра думу гьаци гъубзна.
Руслан Аьзизовди чан удучIвну улхбаъ хабар тувганси, зиихъ къайд дапIнайи 114 касдикан 11-риз хулар гъадагъну тувну. Дурарин арайиъ Ражабов Къурбан Малларажабович (27 йис, Хьарагъ гъул), Аьлиризаева (Аьбдуселимова) Венера Юсуфовна (26 йис, Хючна гъул), Гьяжиева Аида Гьяжиевна (26 йис, Гурихъ гъул), Бабаева (Халимбегова) Оксана Низамудиновна (26 йис, ХустIил гъул), Рашидов (Таригъулиев) Кемран Тельманович (26 йис, ТинитI гъул), Аьлимирзаева (Мутелимова) Эльмира Мирзамягьямедовна (29 йис, Хючна гъул), Гюлова (Гьяжиева) Камила Аьбдулкьадировна (26 йис, Хючна гъул), Аскерова Снежанна Сабировна (30 йис, Хючна гъул), Насурова (Селимова) Наида Шамсудиновна (28 йис, ТинитI гъул), Рамазанов Расим Имамудинович (26 йис, ТIаттил гъул), Шябанова (Пирмягьямедова) Милана Наримановна (26 йис, ГьепIил гъул) а.
2021-пи йисан Табасаран райондиъ нубатнахъ хъайи, абйир-бабар хътру 20 касдизсан федералин ва республикайин бюджетдиан вуйи пулин дакьатарихъ хулар гъадагъбанди ву. Му метлебназ 11 227 260 манат жара дапIна.
