Урусатдиъ 8-пи Март вари халкьарин дишагьлийирин Йигъси къайд апIура, ва думу дилихру йигъ ву. Шагьрарин кючйириъ булди кюкйир масу туври шулу, успагьиди дабалгнайи дишагьлийир ва кюкйирин кунцIар хьайи жилар рякъюру. Му йигъ фу себеб ади тяйин гъапIуб вуш, гьамус гизафдарин кIваинди имдар. Хъа сифте кIул’ан 8-пи март, дишагьлийири чпин ихтиярар уьрхюри, митингар тешкил апIру йигъ вуйи. Гьамус му машквар хьадукар улубкьувалихъди, сабпи кюкйирихъди ва дишагьлийирин успагьивалихъди аьлакьалу апIура. Му машквар гьеле жара уьлкйириъ фици къайд апIураш лигухьа…
Германия
Гьаму уьлкейиъ 8-пи Мартдин машквар арайиз гъабхи Клара Цеткин бабкан гъахьну. Амма, дидиз дилигди, му уьлкейиъ 8-пи март аьдати лихру йигъси гьисаб апIура. Немцари му йигъ дишагьлийири жиларихъди сабси чпин ихтиярар уьрхру, социалин месэлйирин тарихи йигъахъди аьлакьалу дапIна. Германияйиъ яшамиш шулайи жилари му йигъан чпин дишагьлийир машкврихъди тебрик апIудар. ИкибаштIан, Германияйиъ му машкврикан варидариз хабар а, дидкан газатариъ бикIуру, амма аьдатар сар касдира уьрхюри имдар. Мушваъ дишагьлийир майин вазлиъ бабарин Йигъан тебрик апIури аьдат ву.
Польша
Му гьюкуматдиъра 8-пи март аьдати йигъ ву, амма кюкйир артухъди масу туври шулу. Мидланра гъайри, Польшайин бязи жилариз му машквар затра къайд апIуз ккундар. Дурари 8-пи Март Урусатдин машкварси гьисаб апIура.
Куба
Куба гьюкуматдиъ дишагьлийирин Йигъ лапра яркьуди къайд апIури шулу. Кубайин агьалйири дишагьлийирин гьюрматназ карнавалар, аьхю серенжемар, жюрбежюр балар, выставкйир ва гизаф хурагарихьди дабалгнайи столар тешкил апIувал аьдатнаъ ипна. ИкибаштIан, дишагьлийир кюкйир адарди гъузрадар, ва гьацира Кубайиъ му йигъ дилихру йигъси тяйин дапIна.
Болгария
Улихьна йисари му машквар Болгарияйиъ яркьуди къайд апIури гъахьну. Гьамус думу яваш-явашди тарихназ гъябгъюра. Болгарияйиъра му йигъ аьдати лихру йигъ ву, амма ляхнин кьяляхъ жилари чпин дишагьлийир тебрик апIуру. Хъа пешкешар ва кюкйир тувбан аьдатра тарихназ гъубшну.
Греция
Грекари 8-пи Март къайд апIуру. Дурарин му йигъахъди аьлакьалу швнуб-саб аьдат а. Мисалназ, саб гъулан вая поселокдин вари агьалйир сатIиди уч духьну, гьадму йишваъ варитIан гьюрматлу дишагьли машкврихъди тебрик апIуз гъягъюру. Жара аьдат зарафатнануб ву: му йигъан дишагьлийири чпин жилариин марцци штар улурзуру, ва жилириз хъял гъафишра, дугъу му дюшюш зарафатниинди алдапIуру.
Франция ва Италия
Му уьлкйириъра дишагьлийирин Йигъ къайд апIури шулдар. Вушра, Италияйиъ му йигъан дуст шубар сатIиди уч шулу ва шадвал апIуру. Хъа Францияйиъ дишагьлийир майин вазлиъ бабарин Йигъан тебрик апIуру, хъа жигьил шубари чпин пешкешар пак вуйи Валентиндин Йигъан гъадагъуру.
Япония
Японияйиъ кIулди вари март ваз дишагьлийириз бахш дапIнайиб ву. Думу вазлиъ душваъ Жвугърийирин гьари кюкю апIбан машквар, Шубарин машквар, Лизи йигъ ва Жаквларин машквар кIули гъягъюру. Мисалназ, Лизи йигъ машквар 14-пи мартдиъ къайд апIуру. Му йигъан 14-пи февралиъ чпин жилар тебрик гъапIу дишагьлийириз пешкешар тувру.
Жаквларин йигъ Японияйиъ яркьуди къайд апIувал аьдатнаъ абхъна. Му йигъан вари уьлкейиъ жаквларин выставкйир тешкил апIуру ва шубариз пешкешар тувру. Японияйиъ жакул дишагьлийин назуквалин ва гюрчегвалин лишанси гьисаб дапIна. Му гьюкуматдиъ швуваз хъаъру шуран жигьиздиъ 15-тIан артухъ жюрбежюр жаквлар ади ккунду. Уьру ккуртт али жаквли дурарин арайиъ варитIан важиблу йишв бисура. Японияйин агьалйирин фикриинди, диди жилирин ккебгърайи цIийи хизандиз девлет ва берекет хуз кьувват тувру.
Уганда
Угандайиъ ва Африкайин жара швнуб-саб уьлкейиъ айту а: дидиъ дегьзаманайиъ Африкайин сар дишагьлийи сар чпин аллагьдин кIуллан маргъ гъивну кIура. Мидкан Африкайин аллгьариз хъял гъафну ва дурари Африкайиина уьмурлугъдиз манишан гьапIру, жилар бегьерсуздар хьуз гъитру ва штун кьадарра цIиб апIуру. Африкайин дишагьлийири, чпи икрам апIурайи аллгьариз гьюрмат улупури ва дурарин хъял яваш апIури, нириъ дижикIну, чпиин успагьи палтар алахьну, ялхъвнар апIуз гъягъюру.
Вьетнам
Вьетнамдиъ 8-пи Март варитIан ккуни ва инсанар ккилигури шлу машкврарикан саб ву. Му машкврин йигъан Вьетнамдин туканариъ дишагьлийириз мутмйир, улупнайи кьиматтIан асина кудучIвну, масу тувру. Му йигъан вари гьюкуматдиъ концертдин программйир гъягъюру.
