Дагъустандиъ айи РФ-дин МВД-йин пресс-гъуллугънаан мялум гъапIганси, гьаму йигъари, республикайиъ наркотикар масу туври, Мягьячгъала шагьриъ яшамиш шулайи адаш ва риш гъидисну.
Къайд дапIну ккундуки, гьаму жюрейин тахсиркарвалар апIбаан думу дишагьли улихьди кьюб ражари уголовный жавабдарвалихъна духнайир вуйи.
Наркотикар масу тувбан рякъюз дишагьлийи чан яш 69 йис дубхьнайи адашра жалб гъапIну.
Пресс-гъуллугънаан къайд гъапIганси, полицияйин вакилариз, республикайин меркездиъ жюрбежюр хуларин багарихь жини йишвар ишлетмиш апIури, 40 йис яш дубхьнайи дишагьлийи ва дугъан адашди наркотикар масу туврайиваликан хабар шулу. Шуру, муштарйир агури, наркотикар масу туври гъахьну, хъа адашдин вазифа – масу тувуз гъадагънайи наркотикар йишв’ина духну, дурар жини йишваъ гьитIикIну дивуб вуйи. Му ляхин кIули гъабхбаз адашдиз саб суткайиъ кьюд агъзур манат туври гъахьну.
«Му ляхнихъ хъюгъюз узуз йиз шуру теклиф гъапIну. Узу, кьюб вазлин арайиъ Мягьячгъала шагьриъ жини жюрбежюр йишвар тешкил апIури, гьадушвариъ наркотик кайи сурсат диври гъахьунза», — гъапну пенсионери.
Адаш ва риш чпин машиндиъ Мягьячгъала шагьриъ гъидисну. Полицияйин вакилари машин ахтармиш гъапIу вахтна, дидиъ масу тувуз ихтияр адру, гизаф кьадар наркотикдин сурсат кайидарин сиягьназ гъадабгънайи 67,2 грамм «Прегабалин» дармнан гъибихъну. Полицияйин отделиъ дурари тахсиркарвал гардандиъ гъибисну. Пенсионерин гафариинди, думу наркотикар масу тувуз, чан риш гьадму «пишейихь» ярхла апIуз кIури, хъюгънийи. Хъа шуру силисариъ мялум гъапIганси, му рякъюз думу уьмрин гъагъи аьгьвалатну гъахну.
«Узуз му дармнари ва наркотикари инсандин бедендиз чIуру тясир апIруваликан, диди инсан аьжалихъна хруваликан хабар азуз. Мидкан узу фикирра апIури гъахьунза. Амма уьмрин читин аьгьвалатну ва кайи буржари му ляхин давам апIуз гъитнийзухъди. Гьамусяаьт хьайи дармнар сад-кьюд йигъан масу тувну, му рякъ’ан удучIвурза кIури, фикир апIури гъахьнийза…», — силисариъ къайд гъапIну дишагьлийи.
Къанун уьбхру органарин вакилари, къанунсузди агъу ва наркотик кайи сурсатар масу тувбахъди аьлакьалу вуди, шур’ина ва адашдиина уголовный дело гъитIибкIну.
