Мялум вуйиганси, 2020-пи йисан регионарин арайиъ кIулиъ гъубшу гъулан мяишатдин сурсатарин «Урусатдин тIяъмар» кIуру 1-пи милли конкурсдиъ дагъустандин чарвйирин йикку сабпи йишв гъадабгъну.

 

Гьадму конкурсдин кьяляхъ, Дагъустандиъ гьясил гъапIу чарвайин йиккуз муштарйир, ихь вари гьюкуматдиъси, жара гьюкуматарианра йигълан-йигъаз артухъ шула. Гьаци вуйивализ лигну, аьхиримжи вахтна респуб-ликайин гъулан мяишатдин малдарвалин цирклиъ асас вуди чарвйирин кьадар артухъ апIуз хъюгъна. Гьамусяаьт Урусатдин регионарин арайиъ гьаму улупбариан Дагъустан сабпи йишв’ин ал.

Дагъустандин чарвйирин йиккун дадлувалин асас себеб – ихь республикайиъ швнуд-сад аьсрариинди чарвйир кьюрдну галариз, хъа хьадну сивариз хъаъну гъягъюрайивалихъди аьлакьалу ву. Гьаци, йискьубан арайиъ хайлин вахтна чIатариъ уьрхюрайивализ лигну, думу чарвйирин йикк гьарган фермйириъ уьрхру марччарин йикIуз хас вуйи тIяаьм хътруб ву. Гьаддиз дидиз муштарйирра гизаф шула.

Гьар йисан октябрин вазлиан мина республикайин дагълу районарин малар-марччар, кьюрд адапIбан бадали, галариз хъаъра. Дагъустандиъ галар республикайин аьтрафариин швнуд-сад зонйириъ ерлешмиш духьна. Гьарсаб зонайиъ айи марччари гьамусяаьт ччиларра апIура. РД-йин гъулан мяишатдинна ипIру-убхъру сурсатарин министерствойин малдарвалин управлениейин кIулиъ айирин заместитель Юсуф Юсуфовди туву мялуматариинди, гьамусяаьт галариъ айи марччари ччилар хура. Дугъу къайд гъапIганси, республикайин хьуб зонайин галариъ уьрхюрайи 38 муниципалитетдин 210 841 чарвйири гъапIу ччиларикан 204 277 ччил гъузна.

Ихь районарикан улхуруш, Хив райондин чарвйир Дербентдин зонайин галариъ а. Юсуф Юсуфовди тувнайи мялуматариинди, думу зонайиъ айи баб-марччарин кьадар 42640 чарва ву. Гьадрарикан гъийин йигъаз 19 120 чарвайи гъапIу ччиларикан гъузнайидар 18517 ччил ву. Му зонайин галариъ уьрхюрайи чарвйирин уьмуми кьадарнакан 7820 баб-марччар Хив райондиан хъаънайидар ву. Гьадму кьадарнакан 2880 чарвайи гъапIу ччиларикан гъийин йигъаз гъуздар 2650 ччил ву.