25-пи мартдиъ Мягьячгъала шагьриъ РД-йин жигьиларин ляхнариз лигру министерствойиз дахил шулайи Республикайин жигьиларин центрин майдандиин гьаму министерствойи тешкил дапIнайи «Дадайикан гаф» кIуру шиърар урхбан республикайин конкурс кIулиъ гъубшну.

 

Конкурс, дидин иштиракчйир яшарин кьюб дестейиз (15 йислан 19 йис’ина ва 20 йислан 25 йис’ина) пай дапIну, кIули гъубхнийи.
Конкурсдиъ вари республикайиан 96 кас иштирак гъахьнийи. Жюрийи конкурсдин иштиракчйири шиърин гафар гъалатIар ктарди пувализ, гьисслувализ, урхбан тясирлувализ ва мянайиз асас фикир тувнийи.

Вари 96 касди шиърар урхбан кьяляхъ, жюрийи гъиву натижйириинди 20 йислан 25 йис’ина яшар айи иштиракчйирин арайиъ 1-пи йишв гъадабгъур ихь ватанагьли, Гьюкуматдин табасаран драмтеатрин актер Аким Сяидялиев ву. Дугъу Расул Гьямзатовдин «Уьрхяй дадйир» кIуру шиир гъурхнийи.

«Му конкурс райондин дережайиъдира онлайн жюрейиинди кIули гъубшу. Душваъ сабпи йишван сагьиб гъахьиган, узу региондин дережайиъдира конкурсдиъ иштирак гъахьунза ва шиир урус чIалниинди гъурхунза. Узу шиир урхувалин саягъ жюрийиз кьабул гъабхьнийи»,

– къайд гъапIнийи Акимди.