СацIиб аьлхъюхьа

 

Кьюр кас полицияйин участокдиъ. Полицейскийди гьерхра:
– Уву гьаму касдиз кьастниинди кучIал гъапIувал гардандиъ бисурава? Уву кучIал апIбан натижайиъ гьаму касди гьавайиди 100 агъзур манат харжар гъапIну.
– Ав, тахсир йизуб ву. Амма тахсиркарвал пучIу апIру далил азуз.
– Фициб?
– Думу йигъ сабпи апрель вуйи!

 

 

* * *
Сабпи апрелиъ хябяхъган ляхниан хулаз гъафи жилирихьан хпири гьерхра:
– Фици гъубшнияв йигъ? Ляхниъ зарафатар гъапIнийинчва?
– Ав, ич аьхюри идарайиъ лихурайидарин кьадар кам апIурайивалин приказдихъди таниш гъапIган, учу вари аьлхъюз хъюгънийча. ВуйиштIан, думу зарафат дайи.

 

* * *
– Йиз ккунир, узу бицIир хуз гъагъдиъ аза.
– Фууу?!
– 1-пи апрель мубарак ибшри, ккунир!
– Вайгьарай, Марият, йиз юкIв тIубкIурайваки!
– Вагь, узуз фуж гъапнийва? Узу увуз Марият вуйин?!
– Явра 1-пи апрель мубарак ибшри, йиз ужур!

 

* * *
МучIу рангнан костюмдин йирфарик лизи гьякран цIарар кади гъябкъю Расули Мирзайиз кIуру:
– Я бай, яв костюм кьялхъянди кабцIна, марцц апIин!
– Хъугърадарза! Гъи 1-пи апрель ву! Гъи узуз му кучIал апIурайир уву сарпир дарва.