30-пи мартдиъ Табасаран райондин военный комиссариатдин призывникар гьязур апIру отделениейин начальник Рафик Кьасумовди гъулариъ айи советарин ВУС-ариъ (военный гьисабназ гъадабгъру идара) лихурайи гъуллугъчйирихъди хьадукран призывдиз бахш дапIнайи совещание кIули гъубхну.
Хьадукран призывдиъ Табасаран райондиан Урусатдин армияйин жергйириз 65 бажаранлу баяр гъягъиди, дурарин кьадар цци 20 касдиинакьан артухъ апIубра мумкин ву. Жигьилар 12 вазлин арайиъ армияйиъ гъуллугъ апIуз жюрбежюр йишваризди гьаъди – Урусатдин кьибла терефнан округдиз, Яракьлу кьувватарин кьялан округдиз, Ригъ алабхъру терефнан ва Ригъ гьудубчIвру терефнан округариз, гьацира Кафари флотдиз. Жигьилари оборонайин министерствойин ва Росгвардияйин частариъ гъуллугъ апIиди.
Призывникарихьна вуйи тIала-барикан кIуруш, гьарсар жигьил ахтармиш апIиди. «РФ-дин оборонайин министерствойин кIулиъ айидарин тIалабниинди, дявдин гъуллугъназ гъягъюрайи гьарсар ватандашдин, дугъан багахьлуйирин тахсиркарвалар апIру дестйирихъди аьлакьа аш, ахтармиш апIиди. Армияйиъ лазим вуйи гъуллугъарин пише гъадабгънайи ватандашар сабпи нубатнаъди Яракьлу кьувватариз гъуллугъназ гъадагъиди. Табасаран райондиан гизафси, 9-пи классдихъан дурхну, машин хъапIуз ихтияр тувру документ гъадабгънайи, В-С категория айи машин хъапIрудар гъахиди», – мялум гъапIну Рафик Кьасумовди.
Призывдин комиссйирин ляхин, ватандашар военный комиссариатдиз гъюру йигъар тасдикь дапIну, гьаддиз асас вуди албагна. Армияйихьан азад апIру ва армияйиз гъягъру вахт (урхувалихъди ва жара ляхнарихъди аьлакьалу вуди) давам апIуз ният айидар армияйиз гъягърударихьан жаради кьабул апIиди.
Уч духьнайи советарин ВУС-ариъ лихурайи гъуллугъчйирикан, ужударсдар ва сагъу жигьилар гъядягъбан бадали, 1-пи апрелиан 9-пи апрелиз графикдиинди гьарсаб советдиан 15-20 кас хъади гъювал тIалаб гъапIнийи. Табасаран райондиан улупнайи кьадар жигьилар чпин буржи тамам апIуз гьязурди а кIури, 10-пи апрелиъ Мягьячгъала шагьриз мялумат тувну ккунду. Гъийин йигъаз, райондин жюрбежюр йишвариан цIи-цIибди гъюри, 25 кас, военный комиссия кIули дубхну, гьязурди а.
Гьамусяаьт варитIан важиблу месэла, коронавирус тарарабгъбан, думу къурхулу уьзур призывникарик ва военкоматариъ лихурайи гъуллугъчйирик ктрубчIвбан бадали, лазим вуйи уьлчмйир кьабул апIувал ву.
