Мартдин 29-пи йигъан Табасаран райондин глава Мягьямед Къурбановди ва РД-йин Халкьдин Собраниейин комитетдин председатель, Табасаран райондин терефнаан РД-йин НС-дин депутат Алавудин Мирзабалаевди, Хючна гъулаъ Табасаран райондин кьялан больницайиъ компьютерин томограф дивувалихъди аьлакьалу вуди, больницайин коллективдихъди гюрюш кIули гъубхну.

 

Серенжем ачмиш апIури, Мягьямед Къурбановди аьхиримжи йисари райондин яшайишдин инфраструктура артмиш апIбаъ ужуб терефнахъинди духьнайи дигиш’валарикан гъапну. Райондин главайи къайд гъапIганси, ЦРБ-йин отделенйириъ рас апIбан ляхнар кIули гъухну, больница деврин тIалабариз жаваб тувру техникайихъди тямин апIура.

«Гьаму йисан райондиъ цIийи поликлиникайин дарамат дивуз хъюгъди, СиртIич гъулаъ участокдин больница тикмиш апIувал планламиш апIура. 2021-пи йисан модулин 4 цIийи ФАП-ар ва духтирвалин амбулатория тикмиш апIбанди ву. Мидланра савайи, респуб-ликайин сагъламвал уьбхбан министерствойин ва райондин администрацияйин кюмекниинди, ЦРБ-йин аьтрафар къайдайиз хпан бадали, пулин дакьатар жара дапIна»,

– къайд гъапIну Мягьямед Къурбановди.

Чан удучIвну улхбаъ Алавудин Мирзабалаевди коронавирусдин тягъвнихъди аькси женгнаъ заан пишекарвал улупу духтрариз республикайин кIулиъ айи Сергей Меликовдин терефнаан чухсагъул мялум апIбан гафар гъапну. Халкьдин Собраниейин депутатди, коронавирусдиз аькси рубар йивбаан Табасаран район улихь хьайидарикан саб вуйиб къайд гъапIну – райондин 565 касди вакцинайин кьюбиб рубарра гъивну.

Гюрюш ккудубкIбан кьяляхъ, райондин больницайин кIулиъ айи Абсередин Мирзабегов дуфнайи хяларра хъади больницайин аьтрафарилан илдицну. Дугъу, компьютерин томограф дивбан бадали, ЦРБ-йин гьяятдиъ тикмиш дапIнайи йишв улупну. ЦРБ-йин кIулин духтри къайд гъапIганси, лап багарихьди томограф албагну, аьзарлуйир кьабул апIуз хъюгъди.