Вахтназ вуди РД-йин Главайин вазифйир тамам апIурайи Сергей Меликовди республикайин правительствойиъ ва гьюкмин ляхин кIулиз адабгъру органариъ кадрйирин гьякьнаан дигиш’валар кIули гъахбан къарар кьабул гъапIну. Региондин кIулиъ айирин указдиз асас вуди, Дагъустандин энергетикайин ва яшайишдинна коммуналин мяишатдин министрди улихьна РД-йин тикилишчивалинна ЖКХ-йин министрин заместителди лихурайи Ризван Мурадов тяйин гъапIну.
Ризван Уьсманович Мурадов 1979-пи йисан 6-пи декабриъ Мягьячгъала шагьриъ бабакан гъахьну. 2001-пи йисан Москвайин гьюкуматдин юриствалин академия (МГЮА) ккудубкIну, 2001-пи йисхъан 2002-пи йисазкьан дугъу РФ-дин яракьлу кьувватарин жергйириъ гъуллугъ апIури гъахьну. 2003-2009-пи йисари Ризван Мурадов Мягьячгъала шагьрин «Рукьан ва бетондин алатарин завод» ОАО-йин юридический отделин начальникди, директорин заместителди, коммерцияйин директорди гъилихну. 2009-2014-пи йисари Ризван Уьсманович Избербаш шагьриъ «Тикилишчивалин ляхнар апIру кархана» ООО-йин юристди лихури гъахьну. 2010-пи йисхъан 2018-пи йисазкьан думу хусуси дилаварчи кас вуйи. 2019-пи йисан Ризван Мурадов Дагъустан Республикайин тикилишчивалин, яшайишдинна коммуналин мяишатдин министрин заместителди тяйин гъапIнийи.
Эвленмиш духьнайир ву, дугъу шубур велед тербияламиш апIура.
Гьюрматлу Ризван Уьсманович!
Уву Дагъустандин энергетикайин ва яшайишдинна коммуналин мяишатдин министрин гъуллугъниин дерккувалихъди кIваантIан тебрик апIурача.
Уву кIулиъ дерккнайи министерствойин гъайгъушнар фукьан читиндар вуш, вари гъавриъ ахьа. Ихь хулар гьаммишан аквнахъди, манишнахъди ва марццишнахъди тямин апIувал – министерствойин пишекрарин буржи ву. Ичв гьар йигъандин зегьметнакан инсанарин яшайишдин важиблу гъурулушар асиллу шула. Министерствойин идарйирин ужуб ляхин шагьрарин ва районарин агьалйириз марцци гьаватIан артухъ лазим ву.
Ризван Уьсманович, яв улихь дивнайи месэлйир, ляхнин вазифйир хъуркьувалиинди, намуслувалиинди тамам апIуз Аллагьди мюгькам сагъ’вал, сабурлувал ва кьувват тувривуз. Яв зегьметнан натижйири уву ва ихь халкь рази апIруганси ибшри.
Газатдин редакцияйин
коллектив
