Апрелин 21-пи йигъан Мягьячгъалайиъ, Готфрид Гьясановдин ччвурнахъ хъайи музыкайин училищейиъ республикайин бицIидарин «Сюгьюрнан швутIрам» музыкайин конкурс кIули гъубшну. Конкурс РД-йин культурайин министерствойин Республикайин урхбанна методикайин центри тешкил дапIнайиб вуйи.
Конкурсдиъ республикайин жюрбежюр районариан ва шагьрариан вуйи бицIидар иштирак гъахьнийи.
Конкурсдин тешкилатчйири ва жюрийин членари къайд гъапIганси, конкурсдин метлеб музыкайин искусство артмиш апIувал, бажаранлу бицIидар агувал ва дурариз кюмек тувувал ву.
«Сюгьюрнан швутIрам» конкурсдиъ Табасаран райондин Хючна гъулаъ ерлешмиш дубхьнайи, Кьасум Мягьямедовдин ччвурнахъ хъайи искусствйирин мектебдиъ урхурайи бицIидарра иштирак гъахьну. Мялимар – Рашид Салягьудинович Рашидовди ва Рашид Зубаилович Рашидовди регьбервал туврайи «Дуствал» ансамблин иштиракчйири кьюб номинацияйиъ (хилариинди йивру музыкайин алатар ва ил хъибтру музыкайин алатар) 1-пи ва 2-пи йишвар гъадагъну. Ансамблин иштиракчйир вуйи Бесханум Аслановайи, Хадижа Мукаиловайи, Аслан Аслановди, Аьлиаьгьмад Къазиаьгьмедовди, Ислам Исаевди чпин устадвал улупну.
Пешкешнан йишвар гъадагъу коллективдиз 1-пи ва 2-пи дережайин дипломар тувну. РД-йин культурайин министерствойин дипломариинди коллективдин кIулиъ айи мялимарра лишанлу гъапIну.
