2021-пи йисан 21-пи апрелиъ Урусатдин Федерацияйин Президент Владимир Путин Федералин Собраниейихьна гьар йисандин Послание хьади илтIикIну. Послание – уьлкейин айтIан ва чIатан политикайин мяналу терефар улупурайи асас документ ву.
Чан удучIвну улхбан эвелиъ В.Путинди Послание асас вуди уьлкейин айтIан политикайиз бахш дапIнайиб хьибди гъапнийи. Дугъу уьлкейин вари агьалйириз – духтрариз, мялимариз, военный гъуллугънаъ айидариз, волонтерариз, инсанарин сагъ’вал бадали коронавирусдин тIягъвнин вахтна ляхин гъапIдариз – чухсагъул мялум гъапIнийи.
«Урусатдин халкь уьбхювал – уьлкейин улихь дийибгънайи асас месэла ву. Духтрарин тIалабар тамам апIинай. Коронавирусдиз аькси иммунитет арайиз дубхну ккунду. Прививкйир апIинай. ХатIалу эпидемияйиан удучIвуз жара рякъ адар»,
– илтIикIнийи президент уьлкейин ватандашарихьна.
В.Путинди чан улхбаъ асас фикир бицIидарин сагъламвал уьбхбаз, дурар сагъ апIбаз тувну ккуниваликан гъапнийи ва тялукь министерствйириз бицIидарин хьадан лагерариз вуйи путевкайин кьиматнан гьацI пай кьяляхъ апIуз мумкинвалар агбан буйругъ тувнийи.
В.Путинди къайд гъапIганси, гъюру йисан яшайишдин вари справкйир «саб унчIв’ан» тувруси ляхин апIуз хъюгъди, хъа шубуд йислан думу справкйир йигънура, йишвнура манзилнаъди тувувал къайдайиъ ипди.
Уьлкейин Президентди июлин садпи йигъ улубкьайиз, бицIидар айи хизанарин яшайишдин тереф уьбхбан бадали кIул’инди вуйи программа гьязур апIувал табшурмиш гъапIнийи. «Дадайи ясана адашди ялгъузди веледар уьрхюрайи хизанариз кюмек тувувал лазим ву. Июлин вазлихъан хъюгъну, бицIидариз 8 йислан 16 йис тамам хьайизкьан, кьялан гьисабниинди, 5650 манат тувуз хъюгъди.
Гъагъдиъ айи, уьмрин читин аьгьвалатнаъ ахънайи дишагьлийириз гьар вазлиъ 6350 манат тувди.
Гьаму йисхъан хъюгъну, велед аьзарлу духьнайиган, бицIирин яш 7 йис хьайизкьан, дугъаз хъайивал апIбан бадали адабгънайи больничный лист маважибдин 100 процентдихъди тямин апIиди.
Мектебдиз гъягъру бицIидар айи хизанариз цци августдин вазлиъ гьар бицIирин кIулихъ саб ражари 10000 манат тувди», – мялум гъапIну В.Путинди. БицIидариз тувру алиментарихъди аьлакьалу месэлара гьял апIуз гаф тувну.
Уьлкейин Президентди гьацира гъулариъ айи культурайин хулар, клубар цIийи алаъбаз 24 миллиард манат жара апIбан теклиф дивну.
Посланиейиъ хайлин фикир образованиейин цирклиъ арайиз гъюру дигиш’валаризра тувнайи. Гьаци, кьюд йисандин арайиъ вузариъ аьлава вуди бюджетдин 45 агъзур йишв ачмиш апIиди, гьадму кьадарнакан 75%-тIан цIиб дарди регионариз тувди. Техникумариъ ва колледжариъ урхурайидарин дестйирин кIулиъ айи кураторариз маважибдиин 5 агъзур манат иливиди.
Уьлкейин экономика, промышленность гъурмиш апIбаз бахш дапIнайи пайнаъ РФ-дин Президентди Урусатдиъ эпидемиологияйин хатIасузвал ва марццишин уьбхбан мюгькам бару дубхьну ккуниваликан гъапну. В.Путиндин фикриинди, хатIалу уьзрариз аькси дармнар гьясил апIбан цирклиъ Урусат чIатан кюмекнакан асиллу дару уьлке дубхьну ккунду.
Президентди регионарин инфраструктура за апIбан бадали, дурариз 15 йисазди 3%-тIан артухъ дару ставкайиинди бюджетдин кредитар тувувалин теклифар дивну. Гьаму йислан ккебгъну, агьалйириз сарун газ участокдихънакьан зигбахъан агьалйири пул тувну ккундар.
Посланиейин аьхириъ В.Путинди чIатан политикайин гьякьнаанра чан лигбар ачмиш гъапIнийи. «Лазим вушра-даршра Урусатдик ктIукьувал спортдин цIийи жюреси дубхьна. Ухьуз вари халкьарин арайиъ дугъри гъуншивалин аьлакьйир уьрхюз ккундухьуз. Хъа эгер шлизкIа дурар чIур апIуз ккун гъабхьиш, жаваб ухди, учIруди, барабарди тувдихьа. Урусатдихъди вуйи «уьру цIарналан» улдучIвуз саризра ккун хьибдар кIури, умуд кивраза, хъа думу цIар наан аш, анжагъ ухьу тяйин апIидихьа», – къайд гъапIну Президентди.
Президент В.Путинди Посланиейиъ атIагу милли артмиш’валин теклифар гьаму йисан июлин садпи йигъаз Госсоветдихъди ва Жямяаьтлугъ палатайихъди гьял дапIну ккунду.
