Гьамусяаьт Дагъустан Республикайиъ хьадукран тумар урзбан ляхнар гьяракатниинди кIули гъягъюра. Дагъустандин районарин гъулан мяишатдин зегьметкешар тахил убзбиин ва картфар, памадрар, арфанйир кивбиин эллешмиш духьна. Аьхиримжи вахтари ужудар натижйир гъадагъури, набататчивалин цирклиан Урусатдин регионарин арайиъ кIакIначи йишв дибиснахьа. Йислан-йисаз республикайиъ урзурайи хутIларин кьадарра, гъадабгъурайи бегьерра артухъ шула.
Магьа цци хьадукар цIиб кьанди улубкьну. Гьаддихъди аьлакьалу вуди гъулан мяишатдин ляхнарра энгелди гъахуз хъюгъну. Дагъустан Республикайин гъулан мяишатдин ва ипIру-убхъру сурсатарин министерствойин набататчивалинна жиларин месэлйириз лигру управлениейин начальник Жамбулат Шаибовди учуз туву мялуматариинди, цци ихь республикайиъ хьадукран вазари 225 агъзур гектар жилар урзуз планламиш дапIна. Му кьадар сачтIан 16 агъзур гектарин артухъди ву.
«Хьадукран тумар урзбан ляхнарихъ хъюгъхъан мина, гъийин йигъаз, гьяфтайин арайиъ 27 агъзур гектариъ тумар урзури, 100 агъзур гектариъ тумар дурзну ккудубкIна. Гъийин йигъаз пландиинди кивну ккуни 100% мейвйирин кьадарнакан гьелелиг 40%-тIан кивнадар. Хъа кIул али мягьсуларикан улхуруш, пландиъ улупнайи кьадарнан 73% тамам дапIна. Гьацира гизаф йисариз вуйи укIарин гьякьнаан улхуруш, гъийин йигъаз дурарин 80% дурзна.
Зиихъ улупнайи, дурзну ккуни 225 агъзур гектарик Табасаран райондин 3 агъзурна 686 гектар ва Хив райондин – 2332 гектар хутIларра ка», – гъапну Жамбулат Шаибовди.
Мидланра гъайри, аьхиримжи вахтари республикайиъ дюгдин бегьер гъадабгъбаанра ужудар натижйир улупура, йислан-йисаз му ляхинра артмиш апIури, дюгю убзурайи хутIларин кьадарра артухъ хьуз гъитра. Мидин гьякьнаан министерствойин вакили туву мялуматариинди, цци республикайиъ дюгю убзурайи хутIларин кьадар 26 агъзур гектар ву, яна сачтIан 2 агъзур гектарин артухъди. Гъийин йигъаз улупнайи кьадар хутIлариъ убзуз лазим вуйи кьадар дюгю масу гъадабгъну гьязурди а, хъа гьамусяаьт думу дубзну ккуни хутIлар тартиб апIура.
Гьавайин шартIарра ужудар духьну, нежбрари чпин улихь дивнайи планар тамам апIиди, ва гьаддихъди сабси республикайин экономикайин артмиш’-валикра гьяракат кабхъди кIури, умуд кивдихьа.
