Ватандин Аьхю дяви ккудубкIну, 76 йис дубхьнашра, диди инсанарин юкIвариъ гъиту зийнар гъира ккядярхъюндар. Дявдин вахтари фронтдиз душну, чпикан шилкьан имдарди гъудургу абйирин, адшарин, чвйирин, багахьлуйирин суракь апIурайи касар гъира ими.
Сарун гъудургдар чIивиди гъюруваликан умуд марцциди кадабтIнашра, дурар киву накьваркьан дихъур кIури, миж кади архивариз, дявдин частариз илтIикIурайидарин кьадар цIиб дар. Хъа сасдар фронтовикар дявдиан чIивиди гъафнушра, читин ва къайдасуз йисари чпин документар дудургну, ясана военкоматариъ дурар ацIру вахтна гъалатIар деетну, гьисабнаъ адарди гъузну.
Гьациб дюшюшдикан учуз Хив райондин Зилдикк гъулан агьали Темирхан Савзихановди ктибтну. Дугъан адаш Минатуллагь Савзиханов, дявдин кьяляхъ йисари ерли гьюкмин идарйириъ гъалатI кади ацIу документариинди сабпну ГъванцIил гъулан агьали гъахьну. Фронтовик дявдин кьяляхъ йисари багъри Зилдикк гъулаъ жюрбежюр жавабдар гъуллугъариъ гъилихнушра, документариъ деебтнайи гъалатI дюз апIрур гъахьундар. Гьаддиз 2015-пи йисан Зилдикк гъулаъ дявдиз гъушдариз бахш дапIнайи кIваин гъитбан ядига-рикра Минатуллагь Савзихановдин ччвур капIнадар.
Аьхю Гъалибвалин Йигъан гъаншариъ, гьаму гъалатI арайиан адабгъбан бадали, Темирхан Савзихановди хътау мялуматариин ассаламиш духьну, Минатуллагь Савзихановдин гьякьнаан якьин мялуматар чап апIурача.
Савзиханов Минатуллагь Савзиханович 1911-пи йисан Зилдикк гъулаъ бабкан гъахьну. Дугъу багъри гъулаъ 7 йисандин мектеб ккудубкIну.
Хив ва Агъул районарин военкоматдиан 2020-пи йисан 3-пи мартдиъ туву справкайиъ дупнайиганси, Минатуллагь Савзиханов 1942-пи йисан 21-пи январиъ Хиварин райвоенкоматдиан фронтдиз гьаъну.
«Память народа. 1941-1945» сайтдиъ тувнайи мялуматариинди, Сабзыханов Минатулла (фамилия гьаму жюрейиинди тувна) 1942-пи йисан 3-пи сентябриъ Мичуринский дявдинна йишвлан йишв’ина алдаъру пунктдиъ айи дявдин частнаан 14-пи запасдин стрелковый бригадайин 58-пи командайиз гьаъну.
9-пи сентябриъ Сабзыханов Минатулла 359-пи запасдин стрелковый полкназ хъуркьну, хъа 28-пи сентябриъ 346-пи запасдин стрелковый дивизияйиз гьаъну. Дидин кьяляхъ Минтуллагь Савзихановди дявдин фуну частариъ гъуллугъ гъапIнуш, мялуматар адар.
Женгариъ дугъаз кьюб ражари зиян гъабхьну, ва багъри гъулаз Савзиханов М. 3-пи группайин инвалид духьну гъафну.
Дявдин кьяляхъ Зилдикк гъулаъ 1-пи Майдин ччвурнахъ хъайи колхоздин складдин заведующийди, хъасин колхоздин бригарди гъилихну. СацIиб вахтналан Дербент шагьриз удучIвну гъушну.
Минатуллагь Савзиханов 1962-пи йисан кечмиш гъахьну.
