Гъийин йигъаз Халагъ гъулаъ яшамиш шулайи Ватандин Аьхю дявдин иштиракчи Гьясан Ражабович Ражабов Табасаран райондиъ имбу сар ветеран ву.
Ватандин Аьхю дяви ккебгъиган, Советарин Союздин вари халкьарихъди сабси Табасаран райондин гъуларианра гизаф агьалйир немцарин чапхунчйирихъди вуйи дявдиз гъягъюз хъюгънийи. Халагъ гъул’ан дих дапIну ва чпин хушниинди Ватан уьбхюз 100 каскьан гъушнийи. Дурарикан аьхюну пай дявдин чюлиъ гъийихнийи, чпикан саб шилра имдарди гъудургнийи.
1942-пи йисан Гьясан Ражабовди Бакуйин военный училищейиъ урхурайи. Училище ккудубкIайиз цIиб вахт ккимиди, званиера тутрувди, чахъди сабси урхурайи баярихъди Гьясан Ражабов 9-пи армияйин гвардейский 11-пи корпусдин дахилнаъди фашистарихъди вуйи гъизгъин женгариз гьаънийи.
Кафари Кавказ бадали, Армавирин багахь саб женгнаъ Гьясан Ражабов чан юлдшарихъди гюллдин «тIурфникк» ккахънийи, ва дугъан арчулну ликриз гъагъи зиян гъабхьнийи. Думу женгнаан фужкIа чIивиди удучIвур кIури, умуд кивуз ляхин адайи, кIваин апIури шулу ветеранди. ТIуркIурайи минйирин сесери ибарра кар дапIнайи эскер, дишла чан лик дачабхьнайивалин гъавриъ гъахьундайи, думу, жара эскрарихъди чвурхури, гюллйириккан ккутIурччвури, улихь гъягъюрайи. Гьадму женгнаъ Гьясан Ражабовдихъди военный училищейиъ урхури гъахьи гизаф баяр гъийихнийи; чан ликриз зиян хьайиз, дугъу дявдин чюлиан зийнар духьнайи чан юлдшар санчастдиз кьял’индии хъчIюрхюри гъахьну.
Гъагъи зиян дубхьнайи Гьясан Ражабов, Тбилиси шагьрин госпиталиъ, лик сагъ апIури, 6 вазли имийи. Дявдиз сагъди гъушу жигьил, духтрари сарун дявдиъ иштирак хьуз удудукьрурси гьисаб дапIну, багъри Табасарандиз гьясйир ккудуркьури кьяляхъ гъафнийи. Багъри гъулаъ думу колхоздин бухгалтерди лихуз хъюгънийи, гъулан советдин секретарди гъилихнийи. ЦIиб вахтналан Гьясан Ражабов Халгъарин халачйирин фабрикайин директорди дерккнийи.
Фабрикайиъ лихурайи халачичйири экспортдиз халачйир урхури гъахьну. Халгъарин халачйирин фабрикайин ад, табасаран дишагьлийин хиларик кайи устадвал вари дюн’яйиз машгьур гъабхьнийи. Гизаф йисари марцци ляхин гъапIу устадариз гьюкуматдин терефнаан орденар, медалар туври гъахьну. Гьадму вахнан гизаф халачичйири Гьясан халуйин дикъатлу хасиятнакан, сабурлуваликан, ляхнихъ хъауз аьгъюваликан кIури шуйи.
Гъи Ватандин Аьхю дявдин иштиракчи чан багъри гъулаъ бицIину балин аьхю, албагу, гьарган хялариз рази вуйи хизандихъди яшамиш шула. Гьясан Ражабовдихьна, дявдин вахтарикан ктибтувал ккун апIури, мектебдиъ урхурайидар, газатар-журналарин журналистар кми-кмиди гъюри шулу. Гьар ражари дявдин вахтарикан чан ихтилат ккудубкIбан кьяляхъ, ветеранди «дявдин сес ктрубкIричвук, жан баяр» кIури шулу.
Дугъу гьацира варидарин 9-пи Майдин машквар мубарак гъапIну. «Гьюрматлу ватанагьлийир! Гъалибвал гъадабгъну магьа, 76 йис тамам гъабхьну. Гьар йисан 9-пи майдиъ ухьу дявдин женгариъ гъийиху, Ватан бадали женг гъубху касар кIваин апIурахьа. Ветеранарин жергйир лап чIикъри гъахьну. Жигьил наслари уьбхюрайи ич гьюрматназ чухсагъул пуз ккундузуз. Их уьлкейиъси, вари дюн’яйиъра затра дяви дарибшри».
