Федералин налогарин гъуллугънан Дагъустандиъ айи управлениейи гьамусяаьт республикайин базрариъ налогар тутрувди ляхин апIурайи касар ашкар апIбан серенжемар кIули гъахура.
Гъийин йигъаз базрариъ гюзчивал гъабхурайи органарихъди сатIиди республикайиъ ахтармиш гъапIу 48 базрарикан анжагъ 13 базартIан лазим вуйи къайдайиинди лихурадар кIури, РД-йин УФНС-дин пресс-гъуллугънан начальник Багьаудин Аьлиевди «Табасарандин нурар» газатдиз хабар тувну. Дугъу мялум гъапIганси, му месэлайин гьакьнаан налогарин органарин гъуллугъчйир жюрбежюр йишвариъ дилаварчивалин цирк-лиъ лихурайидарихъди гюрюшмиш шула. Дилаварчивалин ляхин тамам апIурайи, жюрбежюр сурсатар масу туврайи касарихъди базрариъ кассайин аппаратар дивну ккунивалин гьякьнаан сюгьбатар гъахура.
«Улихьна йигъари му месэлайин гьякьнаан нубатнан ражари совещание кIули гъубшну. Думу совещаниейиъ кассайин аппаратар ишлетмиш апIурайи республикайин жюрбежюр тешкилатарин вакиларра иштирак гъахьну. Базрариъ кассайин аппаратар дивну, дурарин ляхнин къайда за апIбан бадали, зигурайи зегьмет сатIи апIбакан ва базрарин ляхин «сирни-ккан» ккадабгъбакан, дина кредитар тувру карханйир жалб апIбакан сюгьбатар гъухну. Фицики кредитар тувру карханйирихьан чпин ляхин, масу гъадабгъу мутмуйихъан пул хилиз тутрувди, хъа карточкайилан карточкайиина хътапIруганси тешкил апIуз шулу», – гъапну РД-йин УФНС-дин гъуллугъчийи.
Къайд апIуб лазим вуки, муштарийихьан хил’ан хилиз пул гъададабгъруганси, 2021-2022-пи йисариз вуйи тялукь серенжемар ва кьабул дапIну ккуни уьлчмйир атIагнайи планар гьязур апIура. Багарихьди му ляхин уьмриз кечирмиш апIуз хъюгъди ва базрарин къайдасузди апIурайи ляхин «сирниккан» ккадабгъиди.
