Хив райондин культурайинна спортдин, жигьиларин ва туризмдин месэлйириз лигру отделин начальник Казбек Къазиевдин жягьтлувалиинди февралин эвелариан райондин живанарин арайиъ «БицIидарин сес» кIуру мяълийир апIбан конкурс тешкил гъапIнийи.

 

 

Конкурсдиъ иштирак хьуз 41 касди маракьлувал улупну.
Улупнайи серенжем му муддатнаъ этапариинди кIули гъубхну. Натижайиъ финализ варитIан бажаранлудар удучIвну.

Финалиъ живанарин удукьувалариз кьимат тувбан жюрийин дахилнаъди серенжемдиъ Урусатдин лайикьлу артистар Марьям Къазиева, Аьбдуллагь Мирзакеримов, Фаризат Зейналова, Хайир Шахов, табасаран эстрадайин машгьур артист Фахрудин Гюлечев ва жарадар иштирак гъахьну.

Маракьлуди кIули гъубшу мяракайиин, варитIан гюрчег сес айивализ лигну, тамашичйири асас сесер Аскан Яракк гъул’ан вуйи Нариман Керимовдихъанди тувну. Кьюбпи ва шубубпи йишвар Хиварин мектебдиъ урхурайи Гьямида Гьясанбеговайи ва Гъизи Агъамурадовайи гъидисну. Дидланра савайи, Хирччварин мектебдин маракьар гъюрхю Эвелина Ярягьмедова тамашичйириз кьабул хьувализ лигну, хусуси пешкешназ лайикь гъахьну.

Казбек Къазиевди къайд апIурайиганси, конкурсдин асас метлеб – мяълийир апIбан рякъ’ан бажаранлу живанар ашкар апIувал, дурарин тереф дюбхну, лазим кюмек тувувал ву.

– Конкурсдин сабпи этапдиъ 41 набалугъ иштирак гъахьну. Гьарсаб ражари зяифдар гъюдучIвури, финализ варитIан бажаранлудар гъузну. Конкурсдин гьарсар иштиракчийиз чан тербиячйир улупунча. Баркаллагь гьарсариз, хайлин зегьмет гъизигну.

Пуз ккундузузки, гизафдариз учухьна гъюруган сягьнайиина удучIвувал варитIан гъагъиди вуйи. ГучI’вал, нач’вал, артиствалин рякъюъ сифтейин гамар… Хъа финалиъ дурари гьарсар гьяйран гъапIну. Мушваъ варитIан асасуб – баяр-шубарин артиствалин рякъюъ чпин удукьувалар ахтармиш апIбахъ юкIв хъайивал ву. Уьмриъ саб метлеб дивну, думу рякъюъ чпин метлебар бегьем апIбахьна лигимди гъягъюз гьязурвал – му живанарин саб аьхю хъуркьувал ву. Узу ихь живанариин кьадарсуз рази вуза!
Хъа гъалибчйирикан гъапиш, Нарман Керимов, ихь абйири кIуруганси, бабкан шлуган артистди гъахьир ву. Гъи дугъу фунуб мяракара заан дережайиъди гъабхрувалиин инанмиш вуза. Гъит жигьилиз хъуркьувалар ишри!

Шубуб вазлин арайиъ учу конкурс-дин гьарсар иштиракчийин удукьувалар ахтармиш гъапIунча. Дурарикан гьарсариз чан хусуси жилгъа, лигбар ва кьувват а. Ав, финализ дурарикан варитIан бажаранлудартIан гъузундар, хъа кIул’инди узуз дурар вари гъалибчйир вузуз, фицики дурари, гучI, нач гъибтну, чпин удукьувалар ахтармиш апIбан, чпин метлебарихьна рукьбан жилгъа ачмиш гъапIну.

Му аьхю хъуркьувал ву. Гележегдиъра, бажаранлу живанарин тереф уьбхюри, му ляхин давам апIуз зегьмет зигидихьа, – гъапну Казбек Къазиевди.