Урусатдин Президентдин Посланиейин яшайишдин тереф уьбхру цирклин месэлйир уьмриз кечирмиш апIбан бадали, РФ-дин Государствойин Думайиъ «Саб вуйи Урусат» партияйи гьязур дапIнайи дигиш’валар шубубпи, аьхиримжи урхбаъди кьабул гъапIну.
ЦIийиваларикан саб – аьзарлу духьнайи бицIириз хъайивал апIруган, дугъан ургуд йис тамам хьайизкьан тувру больничный, маважибдин 100% гьисаб апIури, тувди. Дидин гьякьнаан «Саб вуйи Урусат» фракцияйин кIулиъ айирин заместитель Андрей Исаевди ктибтну. ЦIийи къайда 2021-пи йисан 1-пи сентябрилан кьувватнаъ убчIвди.
«Гъийин йигъаз больничный тувбан страховой къайда кьувватнаъ а. Эгер лихурайи касдин ляхнин тажруба 6 вазтIан цIиб вуш, больничныйдиъ айиган дугъаз варитIан цIиб вуйи маважибдин гьисабнаан пул тувру. Эгер ляхнин тажруба 6 вазлилан 5 йис’инакьан вуш – маважибдикан 60%, хъа тажруба 5 йислан 8 йис’ина вуш – 80% тувру, 8 йис ва артухъ ляхнин тажруба айидаризтIан 100% туврадар. Ургуд йис дубхьну адру бицIидар, аьдат вуйиганси, тажруба адру жигьил абйир-бабарихъ хъади шулу. Дурар больничныйдиъ айиган, хизандиз гъюру гъазанж цIиб шулу»,
– къайд гъапIну Андрей Исаевди.
Мидланра гъайри, гьамус уьмрин читин аьгьвалатнаъ яшамиш шулайи ва гъагъдиъ айи дишагьлийир фукьан ухди духтрин гьисабнаъ дийи-гъиш, дурариз гьар вазлиъ пул тувди. Думу пул, региондиъ яшамиш хьпан бадали, аьхю инсандиз чарасуз лазим вуйи кьадар дакьатар гъадагъури адрудариз тувди. Июлин 1-пи йигълан тина уьлкейиъ думу пособиейин кьадар 6350 манат хьибди. Думу теклиф Владимир Путин иштирак гъахьи «Саб вуйи Урусатдин» яшайишдин сабпи онлайн-форумдиъ мялум гъапIну.
«Ич гьисабариинди, улихьдин тажруба гьисабназ гъадабгъиган, уьлкейин 630 агъзуриинакьан дишагьлийириз пулин кюмек хьибди», – гъапну Андрей Исаевди.
Шубубпи дигиш’вал, сар бабу-абайи ялгъузди уьрхюрайи, ясана алиментар тувбан гьякьнаан суддин къарар хилиъ айи 8 йислан 16 йис’ина яш дубхьнайи бицIидариз пособие тувбакан ву. Пособие гъадабгъбан бадали, думу бицIир уьрхюрайи хизандин гъазанж региондиъ яшамиш хьуз нуфусдин кIулихъ чарасуз лазим вуйи кьадарси улупнайи пултIан цIибди вуди ккунду.
Гьадму жюрейин пособие, вахт ккимиди дапIнайи гьисабариинди, 360 агъзур бицIириз тувди. Урусатдиъ пособиейин кьадар, кьялан гьисабниинди, 5360 манат тяйин апIиди. Думу пособие тувуз июлин 1-пи йигълан хъюгъди.
Яшайишдин цирклиъ гьаму жюрейин дигиш’валар хьувалихъди аьлакьалуди чан фикрар ачухъ апIувал ккун апIури, учу Мягьячгъалайиъ яшамиш шулайи жигьил хизандин эйси Сабина Мягьямедовайихьна илтIи-кIунча. Дугъан гафар исихъ туврача.
– Владимир Путинди чан Посланиейиъ жигьил дишагьлийириз, бицIидариз вуйи цIийи къайдйирикан гъапиган, гизаф шад гъахьунза. Йиз бицIи шуран яш кьюд йисна гьацI ву. Думу бицIидарин багъдиз гъягъюри, гьацI йис ву. Узухъди хулаъ айи вахтна риш затра иццру шулдайи, хъа гьамус, бицIидарин багъдиз гъушиган, думу кми-кмиди аьзарлу шула. Узу гьюкуматдин ляхниъ аза, ляхнин тажруба 3 йистIан дариз, гьар ражари риш иццру гъахьиган, больничныйдиз удучIвбакк ккабхъру. Хизандиз гъюрайи гъазанж кьюб ражари цIиб шулу. Гьаддиз, больничныйдиз удудучIвбан бадали, иццру духьнайи бицIир бабахь дитри шулза. Хъа цIийи къайда кьувватнаъ убчIвиган, гъазанждикан фикир дарапIди, бицIириз хъайивал апIури хулаъ дусуз хьибди. Жигьил хизанариз кюмек вуди кьабул апIурайи жара дигиш’валарра лап ужудар ву. Гъийин девриъ читин аьгьвалатнаъ айи хизанар гизаф а, дурар чпин читинваларихъди ялгъузди гъитувал ужуб ляхин дар,
– къайд гъапIну Сабинайи.
Гьелбетда, читинвалар алахьу инсанариз кюмек апIувал гьюкуматдин вазифа ву. Хъа, гьяйифки, туврайи кюмекнан кьадар цIиб ву, ва думу кюмекра гьарган сабси варидарихьна рубкьурира шулдар.
