Советарин Союздин вахтари гъийин девринсдар угърийир адайи. Думугандин угърийири гизаф инсанар хьайи йишварихь сумкайиъ айи кисе икI апIуйи ясана жибдиан пул адабгъуйи. ИкIрацIари думу ляхин гьадмукьан устадвалиинди апIуйики, яв жибдиан пул адабгъуваликан хулаз хъуркьигантIан хабар шулдайи.
КIваин илмийиз, жигьил вахтна ляхин ккудубкIбан кьяляхъ, бицIидарин багъдиан бай адагъну, автобусдиъди хулаз душну ккундийи. Автобус дебккру йишвахь гизаф инсанар хьайи. Йиз сумка гъюнихъ хъибхну, хъа хабахъ бай хъади, узура душвахь дийигънийза. Автобус хъубкьиган, варидарихъди сабси дидиъ эънийза, бицIир хьайивализ лигну, автобусдиъ айидари узуз дусру йишвра улупнийи. ЦIиб вахтналан, автобусдиъди гъягъбан гьякъи тувбан бадали, сумкайиъ хил ивнийза, амма кисе гъибихъундайзуз. Лигуруш, узуз хабарра дарди, йиз сумка аьхюди гьадабтIнайи. Мициб аьгьвалатнаъ гьапIуз шулу? ФукIара. Сумкайин жибахъ хъайи кепкар тувну, кIвак аьзаб кади, автобусдиан эдеънийза. Кисейиъ айи пул гизаф дайишра, угърийи гьамци рягьятди йиз пул икI апIбакан дерд дубхьнайзуз. Думу уз’ин гъяаьлхъюбси гьисаб апIурайза. Гьадму дюшюшдихъан тина артухъди мугъаятвал уьбхюри, пул кми-кмиди кисейиъ дарди, сумкайиъ айи китабдигъ гъиври, жараси сумкайиъ иври шуйза.
Гьамус деврар дигиш духьна. Инсанарин хилиъ пул ади шулдар. Гъадабгъу маважибра, пенсияра кмиди банкдин карточкайиин гъубзра. Инсанарин хилиъ пул адаршра, угърийирин, икIрацIарин кьадар цIиб дубхьнадар. Аьксина, артухъ шула. Улихьдин вахтнан угърийири тIубарихьди ляхин апIуйиш, гьамусдин угърийири телефондин кюмекниинди инсанар алдатмиш апIура.
Банкдин картайилан пул алдабгънийиз, кIуру жюрейин ихтилатар телевизориан, социалин сетариан гизаф ерхьури шулу. Банкариъ лихурайи пишекрари аьдати инсанарикан чпи алдатмиш апIуз гъидритувал тIалаб апIура. Гъуху ахтармишариан мялум шула-йиси, рягьятди алдатмиш апIуз шлудар яшлу инсанар, пенсионерар ву. Амма алдатмиш гъапIдарин арайиъ фукьан-вушра жигьиларра а.
Узуз таниш касди улихьнаси гьамциб дюшюшнакан ктибтунзуз. «Элгьет йигъан узу бицIидарихъди хулаъ айи вахтна, «банкдиан» телефондиз дих дапIну, сар дишагьлийи йиз ччвур, адашдин ччвур дупну, угърийириз яв карточкайилан пул алдабгъуз ккундайиваликан аьгъю дубхьначуз, гъапнийи. Думу гафар гъеерхьган, кIвак гъалаб кабхънийиз. Учу улихьнаси ипотекайиз хулар гъадагънийча, гьар вазлиъ банкди йиз карточкайилан пул алдабгъурайи. Телефондиз дих дапIнайи дишагьлийи, уву банкдин хатIасузвал уьбхру пишекрихъди гафар дапIну ккунду, гъапнийи.
Гьамус узухъди сар жили-жвуву гафар апIуз хъюгънийи. Дугъу йиз карточкайиин али пул алдабгъуз дугъриданра чалишмиш’валар апIурайивал тасдикь гъапIнийи. Гьаму касдиз узу алдатмиш апIуз ккундашул кIури, фикрар гъюрайзуз, амма гьапIуз-вуш дугъу кIурайибдихъ хъпехъувал давам апIурайза. Гьамци, телефондихъан узкан тIалаб апIурайиб тамам апIури, гьадму касди гъапи нумрайиз сифте 40 агъзур манат хътапIнийза, хъасин 35 агъзур манатсан хътапIурайивал тасдикь гъапIнийза, амма гьаму вахтна йиз телефондиз банкдин нумрайиан зенг гъафнийи. Йиз телефондиз зенг гъапIуриз жаваб тувнийза. Гьаму ражари дих гъапIу дишагьлийи, уву мялум дару нумрайиз гьаз пул хътапIурава кIури, гьерхнийи. Гьадмуган узу алдатмиш апIбан гъавриъ гъахьиза. Кьялхъян ражари дих гъапIу дишагьли узу кьюбпи ражари хътапIу 35 агъзур манат кьяляхъ апIуз хъуркьнийи, амма сабпи ражари хътапIу 40 агъзур манат сарун йиз карточкайиина кьяляхъ апIуз даршлубси гъубшнийи. Узуз гьамци кучIал апIуз шул кIури, гьичра фикир дайиз. Узу гьарйир-чIигъар гъапIнушра, дигиш апIуз шлуб фукIара адайи. Гьаму дюшюшдикан сарикнара дарпиди гъибтидийза, амма узуси жара касарра угърийири алдатмиш дапIну ккундарзуз, гьаддиз ктибтураза», – гъапнийи дугъу.
Гьюрматлу ватанагьлийир! Угърийирин метлеб – ичв пул жин апIувал ву. Телефодиан дих апIурайириз увкан лап цIибдитIан мялуматар адар. Учвкан артухъ мялуматар аьгъю апIуз мумкинвал мутуван. Ичв картайин нумра ва код дурарихьна мутуванай. Учвуз телефондиз дих гъапIу мялум дару касди апIурайи тIалабар тамам мапIанай. «Увухъди гафар апIуз вахт адариз, гьамус жара телефондиан банкдиз зенг апIурза, банкдиъ лихурайи йиз гъардшиз дих апIурза», кIури гучIар ккаай. Учву алдатмиш апIуз мигъитанай.
