Сяргьятчийин Йигъ – думу йишвнура, йигънура ихь уьлкейин сяргьятар уьрхюрайидарин машквар ву. Ихь уьлкейиъ гьар йисан думу машквар 28-пи майдиъ къайд апIури шулу.

 

Дюн’яйиъ айи аьгьвалат фукьан читинуб вуш, ухьуз рябкъюрахьуз, гьаддиз гьюкуматдин сяргьятар уьрхювал рягьят ляхин дар.

Урусатдин сяргьятарихъ НАТО-йи гъахурайи гьяракатари, жюрбежюр харижи уьлкйириан Урусатдиз кючмиш шулайи касари, террористари, экстремистари, къанундиинди уьлкейиз хуз ихтияр адру мутму хрудари, наркотикарихъди алвер апIурайидари сяргьятчйир гьаммишан мугъаятди гъаравлиъ дерккна.

Дагъустан Республика – Урусатдин варитIан кьибла регион ву. Дагъустандин аьтрафариин къураматдиъ ва Каспий гьюлиъ Азербайжандихъди, Грузия-йихъди, Казахстандихъди, Туркменистандихъди ва Ирандихъди сатIи вуйи сяргьятар ерлемиш духьна.

Урусатдин Каспий гьюл’ин али сяргьятар гъубшу йисхъан мина Дагъустандиз дуфнайи Каспийин флотилияйи уьрхюра. Каспийск шагьриъ военный порт тикмиш дапIна, душваъ лихурайидариз лазим вуйи вари шартIарра тешкил дапIна.

Сяргьятар уьрхюрайи гъуллугъчйир, ичв пишекарвалин йигъ тебрик апIури, учвуз мюгькам сагъ’вал ва сяргьятариин саламатвал ккун апIурача.