Рустам Къурбанов

Чиркквар

Хьадукра лизи пеъли саб
Чиркквар учIвугну йицIисаб:
Лизи, уьру, кIару рангнан –
Уччвудар лап аьламатнан.

Сабнуб лизибдиз тай шулдар,
Эгерки жара рангнандар
Ухьу сатIиди гъадагъиш
Ва лизидарихъди тевиш.

Уьру чиркквартIан кIарудар
СабдииндитIан артухъ дар.
БицIи урхрур, увуз суал:
Гьарсаб рангнан чиркквар швнуб а?

 

Шюшеханум Керимова

Хулан гьяйванатар

Хюнйирихъ шлуси кIарар,
Гьяйвнарихъ шулу даяр.
ЦIигьарихъра чпин мудрар,
«Ме-е» – апIури рагрудар.

Марччарихъ шлуси ччилар,
Хуйирихъ шулу курцIлар.
Гатрихъ – гатдин чиркквар,
Ккунидар мани марцар…

Хулан гьяйванатариз
Ихь кюмек лазим шулу.
ИпIруб тувай дурариз
Гьарсар бали ва шуру.

 

Математикайин дургъунагъар

 

*Фуну шубуб числйири, чиб чпиин иливиганра, чиб чпихъди зарб гъапIганра, сабсиб натижа тувру?

 

*Натижа 7-тIан цIиб, 6-тIан артухъ хьпан бадали 6-дин ва 7-дин арайиъ фициб ишара дивну ккунду?

 

*Термометри манишнан 15 градус улупура. Кьюб гьамцдар термометрари манишнан швнуб градус улупиди?

 

*Гъазарин рамаг тIибхура. Кьасуйиин деънайи Кьасум абайи дурарихьан гьерхру:

– Ичв кьадар варждихьна вуйкIан, гъазар?
Гъазари жаваб тувру:
– Эгер ич кьадарниин гьадмукьансан иливиш, ва хъана гьадму кьадарнан гьацIсан ва хъана гьадму кьадарнан юкьуб пайнакан саб пайсан ва увура учухъди гъитIирхиш, Кьасум аба, гьадмуган шуйи варж.
Йипай, дустар, фукьан гъазар айи рамгиъ?

 

*Аьлди, Керимди ва Велди китабар урхура. Сарин китаб сиягьятарикан, тмунурин – дявдин вахтарикан, шубурпирин – дустваликан ву. Шли фунуб китаб урхура, эгер Керимдин китаб дявдикан ва дустваликан дарш, хъа Велди дустваликан урхурадарш?

 

*Учвуз аьгъюганси, 2 + 2 = 2 x 2. Хъа гьамус уьмумиди чиб-чпиин иливган ва чиб чпихъди зарб гъапIган удубчIвру натижа барабаруб шлу шубуб жюрбежюр числйир кудухай.

 

*Мурадлин гафариинди, кьюд йис улихьна дугъан яшар чан чве МурсалинтIан 3 ражари артухъди вуйи. «Хъа шубуд йислан йиз яшар МурсалинтIан кьюб ражари артухъ хьиди».
Гьамусяаьт Мурадлин ва Мурсалин фукьан яшар ву?

 

*Люкьран саб, бюлбюлин – кьюб, хъа пеълин – сабкьан.
Фтикан гъябгъюра ихтилат?

 

Халкьдин хазнайиан

Гьисаб апIбар

Адна дуна
Шагьтали,
ЦIирцIар дюхюз
Шагьтали.
Ляхин хъадру
Илбихъай,
Кеспи кадру
Дандалай.
Аьхю цIа –
ЦIирцIарин цIа,
Мани цIа –
Гурдарин цIа.

***
Уь-уь-уь-уь!
Уьъдин табар,
Табтиъ кьюлар,
Мурччваъ цIигьар,
ЦIигьран ибар,
БицIи мудрар
Кабалг, дадай.

 

Ухди-ухди кIуру гафар

 

Кьаркьул дагъдин кьаларигъ кьар али кьути.
Гъюрдлан гъюрд’ина гъюрайи гъюд гъибисну гъипIунза.
ТIюргъярин гъюлгъян гъюр гъютIюбччвну.
Мухан хюйин хьуб хинкI.
Хумаъ хьуб хукIу.
ДярчIгъярин гъюлягъ лизи рижв хъайи цIару личI.

 

****

Хазраз чан сирин абгуз кюмек тув (лиг шиклиз)

****

Кроссворд

 

Дишди: 3. Гагулну хил кьувватлу кас. 6. … улин, чархнан, сифун. 7. Гъилицнац, касиб кас. 8. Гъюран чирккв. 10. Шиърин юкьуб цIар. 11. Музыкайин алат. 

Узди: 1. Чвну ва кьюрдну гьарариз ва укIариз йивру лизи ручI. 2. Мектебдиъ урхурайидари гьапIрайи вахтнан саб пай. 4. Вягьши гьяйванат, мал-къарайин душман. 5. Каббар апIру йишв. 9. Савадсуз кас. 10. Кюкдин ччвур.