Гъубшу гьяфтайиъ Гь.Б.Къазиаьгьмедовдин ччвурнахъ хъайи Дербентдин пишекарвалинна педагогвалин колледждиъ табасаран шаир Шюшеханум Керимовайин 60 йис хьпаз бахш дапIнайи юбилейин вечер кIули гъубшну.
Му шадлугънан серенжем, Табасаран милли культурайин автономияйин регьбер, Дербент шагьрин депутатарин Собраниейин председателин заместитель Айваз Аьлихановдин ва шаир, Урусатдин писателарин Союздин член Эльмира Аьшурбеговайин теклифниинди тешкил дапIнайиб вуйи.
Серенжем педколледждин директорин заместитель Ширинат КIаручевайи абццнийи. Дугъу Шюшеханум Керимовайин яратмиш апIбарикан ктибтнийи.
«Сабди умудлу хьуз гъитра – ихь уьмриъ рюгьнан тIалаб вуди поэзияйин вилаятдиъ учIвуз мажбур шулайи шаирар ими. Чпин рюгьнан тIалабариз вафалуди гъузрайи гьацдар шаирарин жергйириъ, дагълу дишагьлийин сяргьятсуз кIван назуквалин ва дугъривалин лишанси, табасаран поэзияйиз гъафи Шюшеханум Керимова рякъюрахьуз.
Шюшеханум Керимова 1960-пи йисан Табасаран райондин Вечрикк гъулаъ бабкан гъахьну. Мектебдин кьяляхъ Шюшеханум Буйнагъскдин педучилищейик урхуз кучIвру, ва думу ккудубкIиган, Таба-саран райондиъ Курккарин ва Хянгъярин кьялан мектебариъ мялимди гъилихну. 1986-пи йисан чан хизандихъди Белгородский областдиз удучIвну гъушу Шюшеханумди мялимвалин кесп дипундар. Дугъу, мялимди лихури, Воронеждин университетдин тарихнан факультетдиъра гъурхну. Поэзияйиин юкIв али ихь ватанагьлийириз Шюшеханум Керимова 1981-пи йисан таниш гъахьну, фицики гьадму вахтна дугъан сифтейин шиърар «Табасарандин нурар» газатдиъ, «Дагъустан дишагьли», «Ппази» журналариъ ва гьацира «Литературайин Табасаран» альманахьдиъ чап апIури гъахьну».
Серенжем заан устадвалиинди табасаран халкьдин драмайин театрин артист Аким Сяидялиевди ва мяълийирин устад Гюльмира Маллялиевайи кIули гъубхнийи.
Шадлугънан серенжемдиъ иштирак’вал апIуз педколледждин студентар, мялимар Ирина Къалабегова ва Аида Насурова, Дербент шагьрин жюрбежюр мектебариъ табасаран чIал киврайи мялимар (Нарижат Пашаева, Заира Шихрягьимова, Разида Рамазанова, Имара Юзбегова), Табасаран райондин ГьепIларин мектебдиъ урхурайи Заира Шябанова, гизаф хялар (педколледждин директор Шарафудин Сейидов, Эмирбег Айдемиров, ФатIимат Мирзаева-Аьлиева, Инаят Римиханова, Диль-фуруз Ханялиева, Зей-наб Дербендли, Тамила Шамсудинова ва хайлин гьацдар жарадар), гьацира шаирин яратмиш апIбарихъ юкIв хъайидар, багахьлуйир уч гъахьнийи.
Табасаран мяълийирин устадар Фахрудин Гюлечевди, Юсуф Рягьимовди Шюшеханум Керимовайин гафариз вуйи мяълийир гъапIнийи. Тамашичйириз ашукь Хидир Хайирбеговди тамам гъапIу «Юрдарин тIяаьм» лапра кьабул гъабхьнийи.
Къайд дапIну ккундуки, Шюшеханум Керимовайи чаз кьабул вуйи урус ва дагъустандин жара халкьарин шаирарин шиърарра табасаран чIалназ таржума апIура.
Дурарин арайиъ Александр Пушкин, Расул Гьямзатов, Уьмар Хайям, Марина Цветаева, Анна Ахматова, Эдуард Асадов, Евгений Евтушенко, Андрей Дементьев ва гьацдар жарадар а. ЦIиб вахтналан гьаци таржума дапIнайи шиърар кайи китаб арайиз удубчIвур кIури, умудлу хьуз шулу.
Гьаму улихьнаси «Алеф» чапханайиъ удубчIву ФатIимат Мирзаева-Аьлиевайин «Кьисматну бахш гъапIу вахт» китабдин редакторра Шюшеханум Керимова ву.
Мектебдиъ урхури гъахьи йисарихъан мина шиърар дикIуз хъюгъю Шюшеханум Керимовайин му ляхнихъ гъира гизаф юкIв хъими. Сифте гъидикIу шиърар чан дадайиз, чйириз, дуст шубариз улупури, дурар аьхю аьшкьниинди урхури гъахьи жигьил шаири, багъри райондин мектебариъ мялимди лихурайи вахтна, баяр-шубар думу вахтари учебникариъ адру жигьил писателарихъди, шаирарихъди таниш апIури, урхурайидарихьди дурарин яратмиш апIбариз фикир тувуз гъитри гъахьну. Гьацира дугъу, шиърарси, райондин газатдиъ макьалйирра дикIуз хъюгъру. Сабпи ражари багъри райондин «Табасарандин нурар» газатдиз хътапIу шиир чап гъапIу вахтнахъан мина гьамусдиз ярхи 40 йис, хъа шиърар дикIуз хъюгъю вахтнахъан мина 46 йис гъушну.
Къайд дапIнайи мяракайиъ иштирак гъахьи хялар удучIвну улхбан кьяляхъ, Шюшеханум Керимовайиз гаф тувнийи. Дугъу гьамци гъапнийи: «Гьюрматлу йиз ккуни бицIи табасаран халкь, узу бадали ликар алдагъбаз учвуз чухсагъул. Му серенжем гьязур апIуз узуз кюмек гъапIу табасаран халкьдин цIийиди тешкил дапIнайи НКА-йин руководитель Айваз Мясубовичдиз, педколледждин директор Шарафудин Гьяжиаьлиевичдиз, дугъан заместитель Ширинат КIаручевайиз, ихь ашукь Хидир Хайирбеговдиз, шаир Эльмира Аьшурбеговайиз, театрин артист Аким Сяидялиевдиз, мяълийирин устадар вуйи Фахрудин Гюлечевдиз, Гюльмира Мал-лаевайиз йиз терефнаан аьхю чухсагъул кIураза. Гьацира Дагъ.Огни шагьриъ яшамиш шулайи бицIи артист Юсуф Рягьимовдиз, Табасаран райондиан гъафи Заира Шябановайиз, колледждиъ ва шагьрин 4-пи, 12-пи, 15-пи, 18-пи мектебариъ табасаран чIал киврайи мялимариз ва му йигъан йиз мяракайиз гъафи, йиз поэзияйиин юкIв али ватанагьлийириз варидариз чухсагъул пуз ккундузуз».
Шюшеханум Керимова Урусатдин писателарин Союздин член ва журналист ву. Думу хайлин йисари «Табасарандин нурар» газатдиъ мухбирди гъилихну. Гъи Шюшеханум Керимова 60 йисандин юбилейихъди «Табасарандин нурар» газатдин вари коллективди мубарак апIура, ва дугъаз сагъ’вал, хушбахтвал, яратмиш апIбан рякъюъ заан хъуркьувалар ккун апIура.
Шиклиъ: Ш.Керимовайин юбилейин серенжемдин иштиракчйир.
