2-пи июндиъ Дагъустандин гьюкуматдин халкьдин мяишатдин университетдиъ (ДГУНХ) РД-йин жиларин ва мал-девлетнан ляхнариз лигру министр Заур Эмеев республикайин журналистарихъди ва жямяаьтлугъ касарихъди гюрюшмиш гъахьну.
Серенжем ачмиш апIури, Заур Эмеевди вахтназ вуди РД-йин Главайин вазифйир тамам апIурайи Сергей Меликовдин табшуругъар тамам апIбан дахилнаъди республикайин жиларин инвертаризация гъабхбан ляхнарин натижйирикан ктибтну. Дугъан гафариинди, гьаму йисан ккудубшу 5 вазлин арайиъ гъапIу ляхнарин натижайиъ ашкар гъабхьиганси, республикайиъ 4 агъзурна 906 жилин участокар хусуси касарин ликрихъ хъитIна, хъа гъийин йигъаз арендайиз тувнайи жиларихъан тувну ккуни буржнан кьадар 250 миллион манат ву.
Журналистарихъди вуйи гюрюшдиъ министр жиларихъди аьлакьалу хайлин месэлйирикан гъулхнийи. Улхуб давам апIури, дугъу ГУПарин гьякьнаанра гъапнийи. Заур Эмеевди туву мялуматариинди, гьамусяаьт республикайиъ 27 ГУП а. Дурарикан 17 ГУП гъулан мяишатдин цирклик кахьра. Гъулан мяишатдиз дахил шулайи ГУПарин хиликк 67 агъзур гектарин жил кка.
«Республикайиъ гъулан мяишатдин цирклин сурсатар гьясил апIурайи ГУПарихь хьайи жиларин кьадар аьхюб вушра, дурарихьан бюджетдиз гъюрайи налогарин кьадар цIибди ву. Мисал вуди 2020-пи йис гъадабгъиш, сач думу ГУПарихьан гъафи налогдин кьадар анжагъ 829 агъзур манаттIан дар. Му кьадар лап цIиб ву. Мициб аьгьвалат, ихь республикайиъси, Урусатдин жара субъектариъра арайиз дуфна. Гьаддиз 2025-пи йисаз Урусатдиъ айи вари ГУПар терг апIиди ва думу ГУПарин жилар арендайиз тувди, ясана дурар ООО-йириз, вая АО-йириз илтIикIиди. Хъа ихь республикайиъ гьамусяаьт терг апIуз 12 ГУП-дин документар гьязур апIура. Гьадрарикан 5 цци хъерхьди»,
– аьлава гъапIну министри.
