Августдин саддиъ Табасаран райондин Хючна гъулаъ ерлешмиш дубхьнайи Ургур чвуччвунна сар чуччун гъалайин аьтрафариин халкьдин яратмишарин «Рубасдин мукьмар» кIуру республикайин мяна айи фестиваль кIули гъабхуз планламиш дапIна.
Къайд дапIну ккундуки, му фестиваль райондиъ гьеле гъубшу аьсрин 80-пи йисарилан гъабхуз хъюгънийи, амма думуган гьаз-вуш фестиваль 4 ражаритIан кIули гъубхундайи. Хъасин 30 йис гъябгъбалан кьяляхъ, сабпи ражари вуди республикайин мяна ади, янаки жара районар-шагьрарианра яратмиш апIбан коллективаризра теклиф дапIну, му фестиваль 2019-пи йисан Табасаран райондин 90 йис тамам хьпан серенжемарин дахилнаъди кIули гъубшну.
«Табасарандин нурар» газатдиз Гьюкуматдин табасаран драмайин театрин директор, Табасаран райондин главайин насигьятчи Аьлимурад Аьлимурадовди туву мялуматариинди, фес-тиваль райондин администрацияйин кюмекниинди ва РД-йин культурайин министерствойиз дахил шулайи халкьдин яратмишарин Хулан тешкиллувалиинди гьамусдихъантина гьар кьюд йисак Табасаран райондиъ кIули гъябгъиди. Улихьна йигъари райондин администрацияйиъ Табасаран райондин глава Мягьямед Къурбановди гьязурлугвалин комитетдихъди фестивалихьна гьязур хьпаз бахш дапIнайи совещание гъубхну. Думу совещаниейиъ райондин глава, уч духьнайидарихьна илтIикIну, дурарикан му серенжемдихьна аьхю жавабдарвалиинди янашмиш хьувал ккун гъапIну, фицики му йигъан райондиъ гизаф хялар кьабул апIувал планламиш дапIна.
«Ав, икибаштIан, фестиваль республикайин мяна айиб вуйивализ лигну, дидиъ иштирак хьуз саб Табасаран райондиан ваъ, хъа республикаийн саки вари муниципалитетариан яратмиш апIбан коллективар, мяълийирин устадар гъиди. «Рубасдин мукьмар» фестиваль гъабхбан асас мяна – халкьдин яратмишарин ккуни мяълийир ва Дагъустандин халкьарин культура артмиш апIбан коллективарин репертуар девлетлу апIувал ву. Мидланра гъайри, фестивалин дахилнаъди халкьдин мяълийир, ялхъвнар апIбан, жюрбежюр алатариин мукьмар йивбан бажаранвал кайи ва халкьдин сяняаьткарвалин устадар арайиз адагъиди»,
– гъапну райондин главайин насигьятчийи.
Сюгьбат давам апIури, Аьлимурад Аьлимурадовди мялум гъапIганси, совещаниейин кьяляхъ думу учвра, райондин культурайин Управлениейин начальник Шамил Аьбдуловра ва Хючна гъулан поселениейин глава Аьбдусалам Гираевра сатIиди фестиваль гъабхру йишван гьялназ лигуз гъушну.
«Къайд апIуз ккундузузки, му серенжем саб мяълийирин фестиваль гъабхбиинди ккудубкIидар. Фестиваль ккебгъайиз улихьна мина дуфнайи касар серенжемдин иштиракчйири гьязур дапIнайи чпин халкьдин хурагарихъди, сяняаьткарвалин шей’арихъди ва культура-йихъди таниш апIру майднарра гъалайин аьтрафариин гьатIарццну хьиди, ва гьацира пягьливнарира чпин нумрар улупиди. Хъа фестивалин асас пай кIули гъябгъру сягьнара гьязур ва дидин вари иштиракчйир наан ерлешмиш апIуруш, учу сатIиди йикьрар апIидича. Му ляхнар кIули гъахбан бадали, янаки вари серенжемдин программа фициб дубхьну ккундуш гьязур апIбан бадали, гьарурихьна чан цирклиан тамам дапIну ккуни ляхнар тувну, главайин табшуругъниинди 4 десте кадагъна. Гьаму 4 десте-йикан ибарат вуйи тешкиллувалин комитетди тамам гъапIу ляхнарин сабпи натижйир 2 гьяфтайин арайиъ гьязур дапIну, хъанара райондин главайихъди совещание хьибди»,
– аьлава гъапIну Аьлимурад Аьлимурадовди.
