Гъябгъюрайи йисан июлин 3-пи ва 4-пи йигъари Мягьячгъалайин А.С.Пушкиндин ччвурнахъ хъайи кючейиъ кьюбпи ражари вуди Дагъустан Республикайин гъулан мяишатдин ва ипIру-убхъру сурсатарин министерствойи тешкил дапIнайи «Дагъустандин мишмиш» кIуру республикайин фестиваль кIули гъябгъиди.

 

«Дагъустандин мишмиш» фестиваль сабпи ражари Гергебил райондин Кикунийин консервйирин заводдиъ кIули гъубшну. Думуган фестивалиъ республикайин мишмишар гьясил апIурайи районариан вари мяишатари иштирак’вал гъапIнийи.

РД-йин гъулан мяишатдин ва ипIру-убхъру сурсатарин министерствойин пресс-гъуллугънаан учуз тувну мялуматариинди, фестивалин дахилнаъди Дагъустандиъ багъманчивал артмиш апI-бахъди аьлакьалу илимдинна тажрубайин конференция, мишмишар гьясил апIбиин машгъул вуйи районарин майднарин выставка, ва гьацира республикаийъ гъясил гъапIу гъулан мяишатдин ужуб ерийин итIру сурсатар, арачйир адарди, багьа дару кьиматариз масу гъадагъуз агьалйириз мумкинвал туврайи ярмарка хьиди.

Фестивалиъ иштирак хьуз варидариз дих апIура.

Къайд апIуз ккундузузки, аьхиримжи вахтна мянфяаьтлу АПК проектдин дахилнаъди республикайиъ кIули гъахурайи серенжемарин натижайиъ мишмишарин багъларин кьадар йислан-йисаз артухъ шула. Мисал вуди гъадабгъиш, сач республикайиъ 35 гектариъ мишмишарин багълар кивну. Амма гьавайин шартIар аьхъюдар хьувализ лигну, хьадукран вахтна хайлин гьарариз зарар гъабхьну. Гьаддиз сач уч гъапIу мишмишарин бегьернан кьдарра сурчантIан саки 10 агъзур тоннайинкьан цIиб вуйи. Хъа цци думу кьадар кьюб ражари артухъ апIуз планламиш дапIна.