Аьхиримжи вахтна жямяаьтлугъдин фунуб гъатаринра улхуб коронавирус уьзрихьан инсанар уьрхбан метлебниинди гъабхурайи вакцинацияйикан ву.
Хив ЦРБ-йин кIулин духтир Агъамягьямад Нурмягьямедовди субут апIурайиганси, улупнайи вахтназ дурари, коронавирусдин уьзур каш ахтармиш апIбан бадали, саки гьар йигъан агьалйирин тялукь анализар апIбан ляхин кIули гъабхура.
– Йишвариин кьабул апIурайи уьлчмйирин натижайиъ Хив райондиъ уьзур яваш дубхьну хайлин вахт вуйи, амма хьадан фаслиъ гъирагъдилан гъулариз агьалйир гъювал кьувватнаъ абхъси, гьяйифки, думу къурхулу уьзур хъанара «чIиви» гъабхьну. Натижайиъ, гъи райондиъ айи аьгьвалат саламатуб ву дупну, ухьхьан я фурс апIуз, я архаин хьуз шуладар. Уьзур тазади Асккан АрхъитI гъулаъ ачмиш гъабхьну. Шубур аьзарлуйин сагъламвал Дербент ва Каспийск шагьрарин коронавирус кайидар сагъ апIру больницйириъ мюгькам апIура. Дурариланра савайи, вирусдин пневмония арайиз дуфнайи 6 кассан ашкар духьна. Аьзарлуйириз лазим вуйи кюмек тувбан бадали, ЦРБ-йин пишекрари аьгьвалат гьар йигъандин гюзчиваликк уьбхюра.
Къайд апIурза, тялукь аьгьвалатнаъ агьалйири духт-рарин, Роспотребнадзорин терефнаан уьзриз аьксиди кьабул апIурайи табшуругъарна тIалабар ижмишнаан уьрхбаъ аьхю мяна а.
Коронавирусдиз аьксиди вакцинация гъабхури, улупнайи вахтназ Хив райондиъ 1320 касди вакцинайин рубар йивна. Гьаму йигъари Хив ЦРБ-йиз РД-йин минздравдиан нубатнан ражари 600 доза рубар хъанара жара дапIна.
Жямяаьтлугъ гъатарин арайиъ вакцинайин гьякьнаан гъизгъинди лихурайи улхбарин натижайиъ хайлиндариз руб йивуз гучI ка. Амма, пуз ккундузуз. Гьюрматлу ватанагьлийир! Тарихназ фикир тувну, инсаният саб жерге уьзрариин гъалиб хьпан рякъяр кIваина гъахиш, гъизгъинди рубар йивбан натижайиъ ухьу битIар, кIамкIар ва хайлин жара гъагъи уьзрарихьан азад гъахьунхьа. Коронавирус уьзрихьанра инсаният уьбхюз кIури, Урусатдиъ вакцина адабгъну. Дидин зиин лазим вуйи ахтармишар духна. Улупнайи вахтназ, жвув ва жвуван багахьлуйирин уьмрар уьзрихьан уьрхбан бадали, му руб агъзрариинди ихь ватандашари йивна.
Гьякьикьатди субут апIу-райиганси, руб йивбан натижайиъ я гъагъи гьялназ гъафир, я кечмиш гъахьир, шюкюр ибшри Аллагьдиз, адар. Лазим дару ихтилатариз иб диривди, ичв сагъламвал уьбхбан гъаразнаъ йихьай! Узу вакцинайин рубди уьзрихьан гьаргандиз азад апIуру кIурадарза, амма диди, уьзур кубчIвишра, думу пучIуди улдубчIвуз кюмек тувру. Гъи инсаниятдин сагъламвалин гележег ухькан гьарсарикан асиллу шулайивал аннамиш дапIну, вахтниинди вакцинация гъабхували ухьуз аьдати уьмрихъна хътакуз мумкинвал тувди.
Руб йивуз гьязур вуйи гьарсар ватандашдихьан, паспорт, СНИЛС ва сагъламвалин полисра хьади, улупнайи вахтназ Хив ЦРБ-йиз илтIикIуз шулу. Духтрар йишв’ин лазим вуйи вари серенжемар гъахуз гьязур ву. Хъа райондин гъулариъ саб кьадар агьалйир рубар йивуз гьязур вуйиваликан учуз йишвариин али сагъламвал уьбхбан пишекрари ва ерли гьюкмин кIулиъ айидари хабар дебккиш, учу фунуб гъулазра душну, йишвариин рубар йивузра гьязур вуча. Му жигьатнаан ЦРБ-йиз лазим вуйи вари мумкинвалар а», – аьлава гъапIну А.Нурмягьямедовди.
