БицIидариз мектебдиз улихьна вуйи аьгъювалар ва тербия тувбан месэлйири гьюкмин цирклиъ важиблу йишв бисура. Улупнайи рякъ’ан ерли йишвариин гъузрайи камивалар терг апIбан жигьатнаан саб жерге серенжемар гъахурашра, месэла гьелелиг аьхиризкьан тамам апIуз дубхьнадар. Му гафар йишвариин бицIидарин багъариз кьабул апIуз нубатнахъ гъузнайи бицIидарин сиягьди субут апIура.
Улупнайи вахтназ Хив райондиъ 9 бицIидарин багъ ляхник ка. Багарихьди Чювекк гъулаъра деврин багъ дивбан ляхнар ккергъбанди ву.
Образованиейин циркил артмиш апIбан жигьатнаан Урусатдиъ гъахурайи серенжемарин арайиъди, гьарсаб цирклиъ бажаранлу пишекрар ашкар дапIну, дурариз гележегдиъ аьлава кюмекар тувбан уьлчмйирра кьабул апIура.
Гьаци улихьна йигъари РД-йин образованиейинна илимдин министерствойиъ «Урусатдин варитIан ужур няня» конкурсдин рес-публикайин дережайин этап кIули гъубхну.
Маракьлуди кIули гъушу талитарин натижайиъ пишекарвалин заан гьязурлуг’вал улупбиинди республикайин жюрбежюр муниципалитетариан вуйи 21 касдин арайиан варитIан ужурси Хив райондин «Ригъ» ччвур али бицIидарин багъдин няня Диана Аьлиризаева гьисаб гъапIну.
Пуз ккундузуз, Диана Хиварин «Ригъ» багъдиъ лихури кьюд йистIан дар, амма му жикъи муддатназ дилигди, думу гьам бицIидариз, гьам дурарин абйир-бабариз лап кьабулди ву. Диана Замировна Аьлиризаева 1989-пи йисан Ставрополь крайдиъ бабкан гъахьну. Думу агъул миллетдин вакил ву.
– Йиз абйир-бабар чпин жигьил вахтна, дагълариъ яшайиш ккабалгбан читинвалар фикриз гъадагъну, Ставрополь крайдиз удучIвну гъушну. Гъурабатдикан гележегдиз учуз ватанра гъабхьну.
Амма кьисматну узу хъанара Дагъустандихъди аьлакьалу гъапIну: узу Хив гъулаз швуваз гъафунза. Таниш дару йишваъ вердиш духьну, яшайиш ккабалгбаъ узуз йиз жилирин хизанари, иллагьки дадайи, аьхю кюмек гъпIунзуз.
Эвленмиш хьпан кьяляхъ, Дербент шагьрин педколледждик урхузра кучIвунза. Цци думу колледж ккудубкIунза.
Хъа бицIидарин багъдиъ зегьмет зигувал, гьякьлуди кIурза, лапра бегелмишди вузуз. Дадайиз варитIан багахьлу кесп – бицIидариз манишин, умунвал тувувал ву. Уву саб фициб вушра кюмек тувбан натижайиъ разишну ацIнайи бицIидарин улар рякъюбтIан аьхю бахт уьмриъ хьуб мумкин дар. Гьелбетда, тялукь ляхниъ кьадар адрубкьан сабурлувал чарасуз лазим ву. Узузра кьюр риш азуз. Нагагь бицIидарин жинжалвалар аьгь апIуз гьязур дарш, бицIидарин багъдиз гъягъюб гъалатI ву. Гележегдиъ тербиячиди лихузра умуд кайиз. Кьисматниин рази вуза», – гъапну Диана Аьлиризаевайи ич сюгьбатнаъ.
Дугъриданра, няняйи бицIидарин уьмриъ аьхю роль уйнамиш апIура. Фицики думу баяр-шубарин вахтниинди уьл ипIбанра, ахбанра, марццишин уьбхбанра гъайгъушнаъ шула. Хайлин дадйири хулаъ чпин веледарин жинжалваларин гьякьнаан наразивалар улупурайи дюшюшарин кми-кмиди шагьид шулайи гъийин девриъ жара бицIидариз манишин тувуз гьязур вуйи Дианайиз ва му кеспнан жилгъайиъ баркаллуди зегьмет зигурайи вари вакилариз чухсагъул пуз ккундузуз. Диана Аьлиризаевайихъди гюрюшмиш хьпан кьяляхъ, узу «багъри дару бицIидар шлуб дар» келимайин гирамивал ихь арайиъ уьбхюри имбувалиин хъанара инанмиш гъахьунза. Гъит Диана уьмриъ чан кIван метлебарихъ хъуркьри!
