Фашистарин Германия Советарин Союздиина алжабгъу йигъхъан мина магьа дюзди 80 йис тамам гъабхьну. Июндин 21-22-пи йигъари, вари ихь уьлкейиъси, ихь республикайиъра, Мягьячгъалайин аьхю паркдиъ «Ватан азад гъапIу эскриз» ядигарихъ, Ватандин Аьхю дяви ккебгъу йигъаз бахш дапIнайи ватанпервервалин «КIваинди уьбхбан шам» серенжем кIули гъубшну.

 

Серенжемдиъ РД-йин Правительствойин председатель Аьбдулфятягь Амирханов, РД-йин айтIан ляхнарин министр Аьбдурашид Мягьямедов, региондин милли политикайинна диндин ляхнарин, мялуматаринна чап апIбарин министерствйирин, республикайин жигьиларин ва жара идарйирин кIулиъ айидар, жямяаьтлугъ тешкилатарин вакилар иштирак гъахьну.

Серенжемдиъ иштирак’вал гъапIу мектебариъ урхурайи 40-ртIан артухъ баяр ва шубар, кархьнайи шамарра хьади, ядигар кьялаъ тIапIну дийигънийи, хъа полицияйин 80-рилан зиина гъуллугъчйир, хилиъ кархьнайи шамарра дидисну, гьарган убгурайи цIа кабхьнайи йишвахьна жерге-жергеди гъафнийи. Вари чпин йишвариин дийигъиган, уч духьнайидари, дакьикьайиъ ккебехъну дийигъну, Ватандин Аьхю дявдиъ гъийихдарин гьюрмат гъюбхнийи. Гьаддин кьяляхъ гьюкмин вакилари, мектебариъ урхурайидари ядигарихъ кюкйир дивну.

Серенжем паркдиъ айи Игитарин аллеяйиъ давам гъапIнийи. Акцияйин иштиракчйири жилиин кархьнайи шамарихьди «Помним…» кIуру гаф гъибикIнийи, «Советарин Союздин Игитарин аллеяйиъ» ядигарихъ кюкйир дивнийи.

Серенжемдиъ, «Кьарнийир» кIуру ччвур тувнайи ялхъван апIури, Мягьячгъалайин 1-пи нумрайин мектебдиъ урхурайи баяр-шубар иштирак гъахьнийи.
«КIваинди уьбхбан шам» акцияйин дахилнаъди Лениндин комсомолин ччвурнахъ хъайи паркдиъ 1000 шам кархьну ва варжариинди шарикар завариз деетну.