23-пи июндиъ вахтназ вуди Дагъустандин Главайин вазифйир тамам апIурайи Сергей Меликовди журналистарихъди вуйи чан гюрюшдиъ «Саб вуйи Урусат» партияйин XX съезддин натижйирикан ктибтну ва республикайиз важиблу вуйи цирклариан суалариз жавабар тувну.

 

«Саб вуйи Урусат» партияйин XX съезддин натижйирикан улхури, Сергей Меликовди сесер тувбан саб вуйи йигъ 2021-пи йисан 19-пи сентябриъ гъябгъруваликан гъапнийи. Мидланра савайи, съезддиъ «Саб вуйи Урусат» партияйин терефнаан Государствойин Думайиз кандидатар мялум гъапIну. Сергей Меликовди съезддиъ уьлкейин Президент Владимир Путин удучIвну улхуваликан чан фикрар ачухъ апIури, гьюкуматдин кIулиъ айири, вари уьлкейиъси, Дагъустандиъра гьял дапIну ккуни, гьаму йисан Федерацияйин Советдиъ Дагъустандин йигъар гъягъюрайи вахтна Дагъустандин делегацияйи улихь диву асас месэлйир гъитIирккуваликан гъапнийи. В.Путинди гъапиганси, сабпи йишв’ин яшайишдин месэлйир гьял апIувал дийибгъна: бицIидар гизаф айи хизанариз, сакьат касариз, яшлуйириз кюмек тувувал; регионариъ инфраструктурайин месэлйир гьял апIувал, газдихъди, штухъди, электричествойихъди агьалйир тямин апIбан, зирзибил марцц апIбан месэлйириз лигувал.

Сергей Меликовди къайд гъапIганси, Владимир Путинди образованиейин ва агьалйирин сагъламвал уьбхбан циркларин артмиш’валикан вуйи месэлйирра гъитIирккну.

Республикайиъ COVID-19-диз аькси вакцинайин рубар йивбакан улхури, региондин главайи, инсанарихъди гьаммишан аьлакьайиъ айи ватандашарин бязи гъатари, сабпи нубатнаъди духтрари, вакцинайин рубар чарасуз вуди йивну ккунивалин къайда дебккуз мумкин вуйиваликан гъапнийи.

Гьацира Сергей Меликовди учв РФ-дин Гьисабнан палатайин кIулиъ айи Алексей Кудриндихъди гюрюшмиш гъахьиваликанра ктибтнийи. Думу гюрюшдиъ яшайишдин аьхю мяна айи, РФ-дин гьюкуматдин программйирин дахилнаъди тикмиш апIуз хъюгъну, амма ккудукIну адру дараматариз дакьатар жара апIувал цIийи алапIбакан сюгьбат гъубхнийи.