Йирхьубпи июндиъ вахтназ вуди РД-йин Главайин вазифйир тамам апIурайи Сергей Меликовди региондин аьтрафариин коронавирусдин инфекция тарабгъувализ аькси Гьяракатнан штабдин нубатнан заседание кIули гъубхну.
Заседаниейиъ Сергей Меликовди туву мялуматариинди, аьхиримжи йишван ва йигъан республикайин больницйириъ COVID-I9-дин лишнар кади аьзарлу духьнайи 468 кас ккаъну. Думу улупбар 2021-пи йис ккебгъхъан мина варитIан заандар ву. Региондин кIулиъ айири гъапиганси, Гьяракатнан штабдин къарарар тамам апIбахъан гьюкмин ляхин кIулиз адабгъурарйи органарин кIулиъ айидари ва муниципалин образованйирин главйири жавабдарвал гъабхура.
Гьацира заседаниейиъ РД-йин Правительствойин председателин заместитель Мурад Къазиевди Гьяракатнан штабдин улихьна кIули гъубху заседаниейин къарар уьмриз кечирмиш апIбан ляхникан мялуматар тувнийи. Дугъан гафариинди, республикайиз коронавирусдиз аькси вакцинайин вари 190 агъзур доза гъахнийи. Гъийин йигъаз гьадму кьадарнакан 34 агъзур доза ишлетмиш дарапIди ими.
Коронавирусдин тягъюн тарабгъувал яваш апIбан бадали, региондиъ кьабул апIурайи уьлчмйирикан Роспотребнадзорин РД-йиъ айи Управлениейин кIулиъ айи Николай Павловди ктибтну. Дугъу гъапиганси, республикайиъ айи аьгьвалат йигълан-йигъаз читин шула, тягъюн тарабгъуз хъюгъхъан мина Дагъустандиъ коронавирусдиан аьзарлу гъахьи 36,8 агъзур кас гьисабназ гъадагъна, аьхиримжи йишван ва йигъан 168 касдик думу уьзур кайивал тасдикь гъапIну. «Гъубшу йисан майдин вазлихъан мина му кьадар аьхю улупбар гъахьундайи. ГьамустIан кьюрдун вахтна аьзарлуйирин кадар цIибди вуйи», ‒ гъапну Николай Павловди. Дугъу мялум гъапIганси, аьзарлу духьнайидар гизафси аьхю яшнан инсанар ву, амма дурарин арайиъ бицIидарра, студентарин яшнан жигьиларра а.
Николай Павловдин гафариинди, уьзур ачмиш гъабхьи йишв вахтниинди тартиб дарапIрайивали аьзарлуйирин кьадар артухъ хьуз гъитра. «Хъяркьнайи йишвариъ гизаф инсанарин иштирак’валиинди жюрбежюр серенжемар гъахувал къадагъа апIбан гьякьнаан кьабул дапIнайи къарарар варидари тамам апIурадар, жямяаьтлугъ транспортдиъ ва жара йишварихь инсанари маскйир алахьурадар»,- гъапну Николай Павловди.
Республикайиъ уьзур тарабгъувалихъди аьлакьалу аьгьвалат лап читин дубхьнайивализ дилигну, Николай Павловди исихъ тувнайи уьлчмйир кьабул апIувалин теклиф дивну: жямяаьтлугъ йишвариъ инсанари маскйир алахьувалиин гюзчивал тямин апIуб; республикайин аьтрафариин, гизаф инсанар иштирак духьну, серенжемар гъахуз къадагъа апIуб; жямяаьтлугъ ипIбар-убхъбар тешкил апIру йишвариъ сар касдиз 4 квадратдин метр алабхъруси гьисаб апIбан, хъа столар арайиъ 1,5-2 метр ади дивбан къайда тяйин апIуб; кальянар зигувал ва дурар хулариз хътаувал къадагъа апIуб; азад вахт адапIру центрарин ляхин дебккуб; диндин улихь хьайидар ктарди, имбуну агьалйир мистариз, килисйириз гъягъювал дебккуб; совещанйир, собранйир, конференцйир манзилнаъди, интернетдин кюмекниинди гъахуб; 65 йис ва думутIан артухъ яшар духьнайи (вакцинайин руб гъивдар ктарди) агьалйир чпи яшамиш шулайи йишвариъ хулариъ гъузувал 2021-пи йисан июлин 31-пи йигъазкьан давам апIуб.
Дагъустандин кIулиъ айи Сергей Меликовди Роспотребнадзорин теклифар кьабул гъапIну.
Заседаниейиъ удучIвну гъулху РД-йин Правительствойин председателин сарпи заместитель Нюсрет Уьмаровди къайд гъапIганси, гъубшу йисан COVID-19 тарабгъувалихъди женг гъабхбан бадали, региондин бюджетдиан 2,6 миллиард манат харж гъапIнийи, гьаму йисан думу жюрейин метлебариз 260 миллион манат жара дапIна. Нюсрет Уьмаровдин гафариинди, гьамусяаьт тягъвнихъди вуйи женгназ 1 миллиард манат жара апIуз мумкинвал а, гьадму гьисабнаан тест-гъурулушар масу гъадагъуз — 400 миллион манат. «Гъийин йигъаз Дагъустан Республикайин резервдин фонднаъ лазим вуйи кьадар дакьатар а»,- гъапну сарпи вице-премьери.
