Гьаму улихьна йигъари Дербент шагьриъ айи музыкайин училищейиъ Дагъустан Республикайин культурайин минис-терствойин кюмекниинди бицIидарин искусствйирин мектебарин ва бицIидарин мукьмар йивру ансанбларин арайиъ «Халкьдин накьишар» кIуру республикайин 5-пи конкурс кIули гъубшну. Дидин натижйирин гьякьнаан узу Табасаран райондин Кьасум Мягьямедовдин ччвурнахъ хъайи искусствйирин мектебдин мялим Рашид Рашидовдихъди сюгьбат гъубхунза.
– Рашид Сялягьудинович, уву регьбервал туврайи «Дуствал» кIуру халкьдин мукьмар йивру ансанбли Дербент шагьриъ гъабхьи «Халкьдин накьишар» конкурсдиъ фицдар хъуркьувалар улупну ва душваъ фицдар коллективар иштирак гъахьну?
— Думу конкурсдиъ иштирак хьпан бадали, Мягьячгъалайиан, Каспийскдиан, Дербентдиан, ва Табасаран, СтIал-Сулейман, Къяйтагъ, Ахцигь, Рутул, Мягьярамкент, Хив районариан коллективар дуфнайи. Му фестивалиъ иштирак гъахьи коллективарин арайиъ Табасаран райондин ансанбль варитIан гизаф, йицIисар иштиракчи айиб вуйи. Дурарин ччвурар жаради ктухуз ккундузуз: Табасаран райондин гимназияйиан – Гьяжиева Амина, Дадашев Нурлан, Рустамов Рашид, Гьяжикеримов Мугьяммед ва Къурбанов Аьгьмед; Хючна лицейдиан – Исаева Асият, Асланова Бесханум, Асланов Аслан, Исаев Ислам; Хючнаарин 2-пи нумрайин мектебдиан – Мукаилова Хадижа айи. Табасаран райондин ансанбли му конкурсдиъ кьюбпи йишв гъибисну. Коллективдиз кьюбпи дережайин диплом ва кубок тувну.
Дупну ккундуки, учу «Халкьдин накьишар» конкурсдиъ 2020-пи йисанра иштирак гъахьнийча, ва думуган шубубпи йишв гъибиснийича. Му коллективдин аьхю хъуркьувал ву. Учу гьар йисан республикайиъ шулайи конкурсариъ заан йишвар гъадагъурача.
– Райондиъ шулайи фицдар серенжемариъ иштирак шулачва?
– Райондиъ гьар йисан гъябгъюрайи «Хядарихьна лик алдабгъурача» кIуру конкурсдин вари жюрейин номинацйириан (каманчи, далдабу, чюнгюр, кларнет, швутIрам йивбаан ва ялхъвнар апIбаан) гьарган сабпи йишвар гъадагъури ача. Мидланра гъайри, райондиъ шулайи вари концертариъра иштирак шулача.
«Дуствал» кIуру ансанблин руководитель Рашид Рашидовдиз, «Халкьдин накьишар» кIуру конкурсдиз ужуб коллектив гьязур апIбаз лигну, РД-йин культурайин министр Зарема Бутаевайихьан кубок ва гьюрматнан кагъаз тувну. Му кас гьацира Табасаран райондин главайи ва культурайин министри саб-швнуб гьюрматнан грамотйир, кубкйир ва жара шей’ар тувбиинди лишанлу дапIна.
Рашидов Рашид Сялягьудинович 1955-пи йисан 1-пи июлиъ Дагъни гъулаъ бабкан гъахьну. 1973-пи йисан дугъу Хючнаарин кьялан мектеб ккудубкIну. Хъа 1974-1976-пи йисари Советарин армияйин жергйириъ гъуллугъ апIури гъахьну. 1977-пи йисан Мягьячгъала шагьриъ айи Г.Гьясановдин ччвурнахъ хъайи музыкайин училищейик урхуз кучIвну ва 1981-пи йисан думу ккудубкIну. 1981-пи йисан Бургьанкентдиъ айи культурайин хулан директорди лихури гъахьну. 2014-пи йисхъанмина Табасаран райондин искусствйирин мектебдин мялимди лихура.
