Майдин хьубпи йигъан Табасаран райондиъ, Ватандин Аьхю дявдиъ Гъалибвал гъадабгъну 74 йис хьпаз бахш вуди, «Гъалибвалин рякъ» ччвур тувну, чиб-чпин кьяляхъди хъирчну, цIарнаъди аьхю кьадар машинар хъаъну гъягъювалин серенжем кIули гъубшну. Райондиъ му жюрейин серенжем гъябгъюри, магьан 5-пи раж ву.

Гьарганси, ццира серенжем тешкил гъапIдар райондин администрацияйин жигьиларин центрин вакилар ву.

КIули гъубшу акцияйиъ Табасаран райондин главайин заместитель Заур Мусаев, РД-йин жигьиларин ляхнариз лигру Министерствойиз дахил шулайи «Республикайин жигьиларин центр» ГКУ-йин директорин заместитель Марат Рягьимов, Хючна гъулан глава Аьбдуселим Гираев ва хайлин жара касар иштирак гъахьнийи.

Серенжемдин тешкилатчи, райондин жигьиларин центрин директор Рамис Рамазановди гъапиганси, машинар хъирчну хъаъну гъягъбан рякъ, Дербент ва Табасаран районарин сяргьятарилан ккебгъну, Хючна гъулан Гъа-либвалин паркдиъ дявдин иштиракчйириз дивнайи гюмбетдихънакьан давам гъабхьнийи.

«Му йигъан кIули гъубшу акцияйиъ 20-тIан артухъ машинари ва 100-дилан зина инсанарира иштирак’вал гъапIну. Вари машинарик Аьхю Гъалибвалин лишнар ккайи лентйир, плакатар ва пайдгъар китIнайи. Хъа варитIан улихьди гъубшу машин – дявдин вахтарин машин вуйи»,

– гъапну Рамис Рамазановди.

Вари машинар улупнайи йишвахьна хъуркьбан кьяляхъ, акцияйин иштиракчйирин улихь удучIвну гъулхдари, Ватандин Аьхю дявдин вахтар кIваинди гъитбан бадали, му жюрейин серенжемар гъахбан мянайикан гъапнийи ва ихь абйириз дявдиъ гъяркъю читинвалар гьич сабанра, саризра дяряркъювал ккун гъапIнийи.