Июндин 20-пи йигъан Москвайиъ лисундин сяаьт 12-диъ Урусатдин Федерацияйин Президент Владимир Путинди прямой эфириъ вари Урусатдин ватандашарин жюрбежюр суалариз жавабар тувуз хъюгъну. Президентдиз тувру суалар кьабул апIуз гьеле июндин 9-пи йигъан ккебгънийи ва жавабар тувуз хъюгъяйиз, дурарин кьадар 1,5 миллионтIан артухъ гъахьнийи.
В.Путиндиз туву сифтейин суаларикан саб лап цIибди вуйи маважибарихъди аьлакьалуб вуйи. «Маважиб цIибди вуйивализ лигну, инсанар кьюб-шубуб йишваъ лихуз мажбур шула», – гъапну суал гъитIибкку агьалйири. Урусатдин кIулиъ айири агьалйирин гъазанжар яваш-явашди за шулайиваликан гъапну. Президентди къайд гъапIганси, пенсионерар ужуб гъазанждихъди тямин апIувал – гьюкуматдин асас метлебарикан саб ву.
Уьлкейиъ айи зир-зибилихъди аьлакьалу месэлайихъди ужуди таниш вуйи РФ-дин Президентди хъархъсар тартиб апIбан гьюкуматдин программайикан ктибт- ну. Дугъан гафариинди, лап багарихьди Урусатдиъ зирзибил тартиб апIру 200 комплекс дивди. Думу программа уьмриз кечирмиш апIуз 300 миллиардтIан артухъ дакьатар лазим ву. Аьхюну пай пулин дакьатар бизнесдиан гъадагъбанди ву.
Урусатдин Президент В.Путинди Кафари Кавказдиъ боевикарихъди женгар гъуху касар дявдин женгарин ветеранариз барабар апIувалин месэла РФ-дин Правительствойиз табшурмиш гъапIну.
Суал 1999-пи йисан гъачгъар архьу Дагъустандин БотIлих гъул’ан тувнийи. В.Путинди 1999-пи йисан Дагъустандиъ гъахьи гьядисйир чан ярхи уьмриъ кIваинди гъузруваликан гъапнийи.
Президентдихьна ватандашар асас вуди ЖКХ-йин, яшайишдин, образованиейин, сагъламвал уьбхбан цирклариан месэлйир хьади илтIикIнийи. Урусатдин Президентди 4 сяаьттIан артухъ вахтна ихь гьюкуматдин агьалйирин жюрбежюр суалариз жавабар тувну.
